Dafina Zeqiri publikoi së fundmi këngën e re, “La Vida”, në bashkëpunim me Gee Dixon, ky i fundit një emër më pak i njohur për muzikën shqiptare, pasi këngëtari i zhanrit Hip-Hop dhe Rap është nga Suedia, vend ku Dafina ka lindur dhe ka zhvilluar një pjesë të karrirës. Duke marrë parasysh natyrën e videoklipeve verore – plazh, bikini, kërcime, vende ekzotike – edhe ky klip s’do të përbënte përjashtim, por ja që koronavirusi u shfaq në skenë dhe Dafina dhe Gee Dixon nuk xhiruan dot në Dubai. Siç e thonë edhe vetë në fillim të videos, “korona i prishi planet dhe na u desh të rimendonim”.
Videoklipi i ri u krijua me të dy këngëtarët, por në vende të ndryshme, Prishtinë dhe Suedi. Klipi është i këndshëm dhe i shoqëruar me shumë animime. Kjo është kënga e katërt që Dafina publikon së fundmi, pas “Njëherë në jetë”, “A je pendu?” me Cricket dhe “Aman” në bashkëpunim me Ledrin dhe LumiB.
Kujtojmë që nuk është hera e parë që videoklipet ndryshojnë ose përshtaten për shkak të pandemisë. Për shembull Loredana dhe Zuna e xhiruan të gjithin brenda mureve të shtëpisë,
ndërsa Kidda realizoi një përmbledhje me videot e fansave. Pra, duhet pak kreativitet dhe kaq.