Pak ditë më parë, nëpër disa portale u tha se “Alban Dudushi është drejt largimit nga Top Channel”, aludim që u duk krejtësisht i pabazë, për sa kohë nuk citoheshin burime dhe nuk kishte një reagim nga Dudushi. Mirëpo lajmi i largimit nga Top Channel pas 20 vitesh u përfol sërish, këtë herë nisur nga një intervistë e reperit MatoLale në “Ftesë në pesë”.

Në një nga këngët e tij, MatoLale përmend Alban Dudushin dhe Bieta, bashkëshortja e Albanit, e pyet më shumë për frazën në fjalë (fraza: prezantues në kët’ loj’, Mato Dudushi). “Na falni ë,” thotë reperi, fjalia e të cilit pasohet nga Bieta me: “Jo, pa problem. Studioja ngjitur është, kanë ca muaj që e kanë lënë bosh, kështu që ndoshta...ë...mund të të shkonte.” Videoja e postuar në Instagramin e Bietës ka mbishkrimin: “Pas 20 vitesh në Top Channel, Alban Dudushi ia lë stafetën MatoLales?” shoqëruar me një emoji që shkel syrin.

Nëpër komente, ndjekësit shkruan: “Mos ishte nga Kina kjo? Nuk do e kemi Dudushin te Topi? Ç’kuptim ka Topi pa figurat e tij? Apo ishte thjesht humor?”, “Nuk do të kthehet më në studio Albani? Jooo, ai nuk mund t’i mungojë Topit”, “Ç’dreqin është kjo? Dua të mendoj që është thjesht një titull ngacmues për videon, apo...?” etj.

I kontaktuar nga Anabel.al nëse është i vërtetë thashethemi i largimit, ai u shpreh se “është në Top Channel”, por shtoi se “vera është e gjatë”. Një deklaratë e tillë hedh poshtë aludimet se ka një vendim zyrtar mbi largimin e tij, por nga ana tjetër lë të hapur projektet e ardhshme, qofshin këto në Top Channel – duke qenë se Top Show e ka përfunduar momentalisht sezonin televiziv dhe është e paqartë nëse do të rikthehet sërish në shtator – qofshin edhe bashkëpunime me media të tjera.

Kujtojmë që nuk është hera e parë që përflitet se Dudushi dhe emisioni i tij, “Top Show”, do të largohet nga Top Channel, ndonëse më parë, përgjigjet kanë qenë pothuajse kategorike - pra kanë mohuar largimin dhe mbylljen e "Top Show" - ndryshe nga deklarata e fundit. Fillimisht u përfol një largim i mundshëm në 2016-n. Asokohe, Dudushi vendosi të thyejë heshtjen dhe tha në Facebook:

“15 vjet në Top Channel, unë jam në shtëpinë time. Llafet e përhapura nëpër portale për ‘Top Show’, ‘Portokalli’, ‘E diell’ janë pa asnjë bazë dhe në vazhdën e një fushate dashakeqe ndaj Top Channel.”

Në maj të 2018-s, pas një “lëvizjeje” historike duke dhënë për herë të parë një intervistë në Tv Klan, në “Në kurthin e Piter Pan”, Dudushi u pyet nga një fëmijë nëse do të largohej nga Top Channel nëse Klani i ofronte më shumë para.

“Unë e kam një punë. Do vij në Klan kur të bëhesh ti drejtor,” iu përgjigj ai fëmijës, duke e thënë larg e larg se s’ka ndërmend të lëvizë nga Top Media.

Në tetor të 2018-s, i pyetur nëse “është i mërzitur që partnerja e tij, Bieta Sulo, del çdo ditë në ekran dhe ai vetëm një herë në javë”, Dudushi deklaroi në “Pop Culture”:

“I lumtur që dal një herë në javë nuk jam, por as i mërzitur”.

Në verën e 2018-s, u përfol edhe për një largim të tij nga televizioni, fill pasi u tha se Blendi Fevziu do të bëhej pjesë e Top Channel. Në një intervistë për “Thumb”, ai u shpreh:

“Të them të drejtën nuk u gëzova, por nga ana tjetër nuk është se pata këtë ‘obobo po iki unë meqë erdhi ky’. Kur flasim për Fevziun dhe emisionin e tij, flasim për një peshë shumë të madhe televizive në vend. Ardhja e tij në Top Channel natyrshëm që krijonte disa pyetje, të cilat unë i bëra. Një ndër to ishte: Ai vjen këtu, por cila është hapësira ime? Nuk u konkretizua dhe nuk kishte kuptim të vazhdonte më biseda.”