Laguna Larga është një qytet i vogël argjentinas me jo më shumë se 6,000 banorë. Në periferi të qytetit kalon një autostradë, në të cilën babai i Paulo Dybala-s, dikur, udhëtonte 140 kilometra për të çuar të birin në akademinë e sportit, që ndodhej në qytetin më të afërt, Cordoba. Pak vende në botë kanë pasionin që argjentinasit kanë për futbollin, sa Dybala tha për CNN se “kur lind, gjëja e parë që të japin është një top”. Ashtu si shumica e fëmijëve në vend, ai u rrit duke ëndërruar që të bëhej futbollist. Pas të atit, talentin e jashtëzakonshëm të tij e vuri re edhe akademia ku stërvitej. Kështu, Dybala u bë pjesë e ekipit kombëtar të Argjentinës, shkoi te Juventus, luajti përkrah Leo Messi-t dhe Cristiano Ronaldo-s, dy futbollistët më të mëdhenj të kohës së tij. E gjitha kjo është e paimagjinueshme.

“Unë gjithmonë kam ëndërruar të jem futbollist, gjithmonë e kam dashur këtë sport dhe të jem i sinqertë, nuk kam menduar kurrë se do të arrij kaq shumë gjëra,” tha ai për CNN. “Përpiqem ta përjetoj çdo ditë, sepse është diçka e paimagjinueshme për një person që vjen nga një qytet i vogël, ku jemi vetëm 6,000 banorë dhe ëndrrat duken të paarritshme.”

Në vitin 2008, kur Dybala ishte vetëm 14 vjeç, i ati ndërroi jetë si pasojë e një beteje me kancerin. Humbja ndikoi te Dybala, sepse ishte mbështetësi i tij më i madh. Megjithatë ai ia doli ta kalonte dhimbjen dhe ta kthente në forcë atë që e konsideron si një nga periudhat më të vështira të jetës. “Nuk di të them se çfarë do të kishte ndodhur sikur ai të ishte ende këtu. Ndoshta e gjithë kjo do të kishte ndodhur, ndoshta jo. Mbase do të kisha jetuar ndryshe.”

Në moshën 17-vjeçare, Dubala nis debutimin në klubet e Argjentinës. Gazetarët sportivë e cilësonin si “La Joya” – xhevahir – një pseudonim që përdoret ende. Në vetëm ndeshjen e dytë, ai theu rekordin 41-vjeçar të një prej sulmuesve më legjendarë të Argjentinës, Mario Kempes, duke u bëra golashënuesi më i ri në akademinë ku stërvitej.

Më vonë, Dybala u bë pjesë e Palermo-s përmes një marrëveshjeje që kapi vlerën e 14 milionë dollarëve për të shkuar më pas te Juventus. Ai është një nga lojtarët e pakët në botë që ka pasur fatin të luajë përkrah Ronaldo-s dhe Messi-t.

Dybala thotë se ka mësuar shumë nga Ronaldo që kur u transferua te Juventusi në vitin 2018. Ai është ndoshta njeriu i duhur për t’iu përgjigjur pyetjes: Messi apo Ronaldo, kush është më i mirë? “Unë shoh një ndryshim të madh mes të dyve, por përpiqem të mos i krahasoj ata. Përpiqem t’i shijoj duke i parë të luajnë dhe të mësoj prej tyre. Ata janë të jashtëzakonshëm, më të mirët, të cilët do t’i kujtojmë gjithmonë dhe unë jam me fat që kam mundësinë të flas me të dy.

Fakte interesante:

1. Paulo Dybala pati mundësinë të zgjidhte midis Polonisë, Argjentinës dhe Italisë për përfaqësimin në arenën ndërkombëtare. Gjyshi i tij ishte nga Polonia dhe shkoi në Argjentinë gjatë Luftës së Dytë Botërore. Nga familja e nënës, Dybala ka origjinë nga Italia. Ai ka marrë gjithashtu edhe nënshtetësinë italiane, por gjithsesi zgjodhi Argjentinën sepse ndihet i tillë.

2. Ndonëse i rritur në një vend me shumë futbollistë të jashtëzakonshëm, idhulli i tij nuk është as Diego Maradona as Lionel Messi, por legjenda e futbollit italian – Andrea Pirlo.

3. Dybala i feston golat me dy mënyra. Së pari duke drejtuar gishtërinjtë drejt qiellit si dedikim për të atin. Së dyti, më e përdorura, është festimi përmes “dybalamask”. “Dybalamask është një maskë gladiatori,” thotë Paulo Dybala. “Kur ne luftojmë, duhet të vendosim maskën e luftëtarit për të qenë më të fortë.”

Që prej 2018-s, ai është në një lidhje me këngëtaren dhe aktoren argjentinase, Oriana Gabriela Sabatini.

Burimi: CNN, Sportsskeda