Aty nga mesi i marsit, kur koronavirusi me origjinë Kinën u përhap në të gjithë botën, shumë vende e gjetën veten në izolim total. Rritja e numrit të të infektuarve si edhe përfundimi i pajisjeve mbrojtëse i detyroi organet qeverisëse që të kërkonin ndihmë. Kontributeve për të parandaluar përhapjen e virusit iu bashkua edhe industria e modës. Dizajneri Christian Siriano as që e kishte menduar se në karrierën e tij do të prodhonte dhe qepte vetë maska për fytyrën.

Sipas InStyle, kur guvernatori i Nju Jorkut tha se nevojitej një ekip që mund të qepte maska mbrojtëse dhe të punonte nga shtëpia, falas, Siriano ishte i pari që u përgjigj. Dizajneri ka qepur më shumë se 30,000 maska duke prodhuar në disa raste edhe 2,000 të tilla në ditë.

“Është kthyer si një biznes,” tha dizajneri, i cili e ka shndërruar atelienë në një “fabrikë” për qepjen e maskave. “Moda është në një periudhë të errët tani. Askush nuk ble rroba, sepse s’ka ku t’i veshë.”

Nisur nga pandemia, Siriano ka ndryshuar qasjen e tij ndaj modës. “Nuk dua të mendoj shumë për të ardhmen, pasi çdo gjë mund të ndryshojë në sekondë. S’do të ketë asnjë rëndësi nëse vesh dikë, ndërkohë që të tjerët janë të sëmurë ose po vdesin.”

Instagrami i Christian Siriano-s është i mbushur me foto gjatë përditshmërisë së tij dhe ekipit teksa prodhojnë qindra maska mbrojtëse në ditë.