Forumi për Mbrojtjen e Trashëgimisë Kulturore bëri publike disa foto që dëshmojnë se dy kolonat e fasadës së fontanës monumentale të Nimfeut të Apolonisë janë shkatërruar nga njerëz të paidentifikuar ende. Ngjarja u konfirmua më pas edhe nga Parku Arkeologjik Kombëtar të Apolonisë.
“Pas denoncimit publik të Forumit, drejtuesit e Parkut Arkeologjik të Apolonisë pranuan vandalizmin e ndodhur më 13 prill nga dora e njeriut e dy prej kolonave të fontanës monumentale të Apolonisë, një monument unikal në botë,” shkruan Forumi për Mbrojtjen e Trashëgimisë Kulture.
“Çfarë përgjegjësia ka kompania që ruan Muzen dhe Parkun Arkeologjik për këtë vandalizim dhe çfarë masash janë marrë nga ana e drejtorisë dhe Ministrisë së Kulturës ndaj saj? [...]Çfarë përgjegjësia ka drejtoria e parkut dhe Ministria e Kulturës për faktin që monumenti ishte i parrethuar, pa tabelën e monumentit të kulturës, pa tabelën shpjeguese të monumentit?”
Parku Arkeologjik i Apolonisë nga ana tjetër thotë:
“Dy kolona të fasadës së fontanës monumentale të Apolonisë janë, fatkeqësisht, dëmtuar dy muaj më parë, gjatë periudhës së izolimit për shkak të Covid 19. Kolonat janë gjetur të thyera në datën 13 prill.
Po atë ditë, pas mbajtjes së procesverbalit nga Zyra e Administrimit dhe Koordinimit të Parqeve Arkeologjike Apoloni dhe Bylis, është lajmëruar Ministria e Kulturës dhe është bërë denoncimi në Polici. Ekspertët e kësaj të fundit kanë ardhur po atë ditë dhe kanë konstatuar dëmet në terren. Tashmë çështja po trajtohet nga organet kompetente.”
Po kështu, Parku Arkeologjik i Apolonisë shtoi se “mbështetur në konsultimet me restauratorë dhe arkeologë të ekipeve, që kryejnë gërmime arkeologjike në Apoloni, është hartuar nga Zyra e Administrimit dhe Koordinimit të Parkut, një projekt restaurimi, i cili është paraqitur për aprovim pranë Këshillit Shkencor të Institutit të Monumenteve.”
Qyteti antik, jo larg Fierit, përbën një nga gjurmët më të hershme arkeologjike të kulturës së lashtë ilire. Si një qytet i mirëfilltë, Apolonia u themelua në fillim të shekullit të shtatë para Krishtit nga kolonizatorët grekë, ndërkohë që gjurmët arkeologjike u zbuluan në fillim të shekullit XIX.
Presidenti Ilir Meta dënoi ngjarjen e rëndë, ndërsa Ministria e Kulturës nuk ka reaguar.
"Dënoj me forcë aktin barbar, taleban dhe anti-kombëtar të shkatërrimit të një prej monumenteve të Parkut Arkeologjik Kombëtar të Apolonisë, pjesë jashtëzakonisht e rëndësishme e fondit të vyer të trashëgimisë kulturore kombëtare." - tha ai ndër të tjera.
