Në ditët e fundit, nisur nga provimi i gjuhës shqipe dhe i letërsisë në maturën shtetërore, një pyetje qarkulloi nëpër rrjete sociale dhe u bë meme e më pas pankartë në protestën e maturantëve te Ministria e Arsimit.
Në një komunikim në A2, drejtoresha e Qendrës së Shërbimeve Arsimore, Rezana Vrapi, u pyet nga një maturante, Kejsi Spahiu, se cila është alternativa e saktë. Vrapi shpjegoi se përgjigjja e saktë është “Turi u hodh në të djathtë për të shmangur shkëmbin dhe gati e përmbysi barkën”. E pyetur në lidhje me këtë alternativë, Vrapi shpjegoi se e gjitha lidhet me detajet si “shkëmbi i dhëmbëzuar” që ndodhet në fjalinë e fundit të paragrafit.
Po për të njëjtën pyetje, maturantja u shpreh se janë disa alternativa të cilat mund të jenë përgjigje e saktë. Më parë, gjatë komunikimit të saj, Vrapi tha se pyetjet me alternativa pranë njëra-tjetrës vendosen për të diferencuar nivelet e nxënësve.
“Nëse pyetja zgjidhet nga të gjithë maturantët atëherë është e nivelit të parë. Por nëse për një pyetje duam që të zgjidhet nga 50% e maturantëve duhet që të paktën 2 alternativa të jenë shumë pranë njëra-tjetrës, në të kundërt nuk bëjmë dot diferencën. Në pyetjet e nivelit të tretë, duhet të jenë 3 alternativa afër njëra-tjetrës, që duhet të zgjidhen nga 20% e maturantëve, ose edhe 5%. Janë pyetje që duhet të bëjnë diferencën, në të kundërt do të na dalin të gjithë me 10. Nuk ka pyetje që zgjidhen nga të gjithë. Ka pyetje të nivelit të ulët, mesatar dhe të lartë. Një nxënës i notës tetë do të shkojë deri në 40 pikë të testit. Një nxënës i dhjetës do të fillojë nga 50 pikë. Por një nxënës që merr 50 pikë nuk është njësoj me atë që merr 58, pavarësisht se të dy janë me 10. Ai që merr 58-60 është një nxënës që i kap këto pyetjet e nivelit të lartë, të cilat duhet të jenë të paktën 4%-5%.” – tha ajo ndër të tjera.
