Shqipëria

Ministrja shpjegon pse nuk do të prononcohet për rastet e abuzimit seksual

Shkruar nga Anabel

4 Qershor 2020

Ministrja shpjegon pse nuk do të prononcohet për rastet e abuzimit

Në fjalën e saj në Kuvend, ministrja e Arsimit, Sportit dhe Rinisë (MASR), Besa Shahini, u shpreh se “sa të jetë ajo ministre, MASR nuk do të prononcohet për rastet individuale të abuzimit” sepse një gjë e tillë kontribuon në ri-abuzimin që i bëhet viktimave.

“Grupi i Organizatave Jo-Qeveritare (OJQ) për mbrojtjen e grave dhe fëmijëve na e kishin nisur një email ku kërkojnë që MASR të prononcohet për raste individuale të abuzimit me të mitur.

Tani, dua të bëj të qartë një gjë: as sot, as dje dhe as kurrë, për sa jam unë ministre, MASR nuk do të prononcohet për rastet individuale të abuzimit, sepse kjo po kontribuon në ri-abuzimin që po i bëni viktimave duke diskutuar detaje të abuzimit dhe duke identifikuar ato. Strukturat arsimore gjithmonë do të flasin publikisht për fenomenin, do të marrin masa parandaluese dhe ndëshkuese, do të mbështesin fëmijët dhe të rinjtë me mjete që iu duhen në jetë për t’u mbrojtur.

Të njëjtën gjë pres edhe nga OJQ-të që merren me mbrojtjen e grave dhe fëmijëve. Ndërprisni menjëherë daljen në media me informacion identifikues për personat që ju duhet t’i mbroni.”

Në vijim shtoi:

“Tek lista e organizatave që na kishin shkruar ishte organizata partnere e Ministrisë së Shëndetësisë dhe Mbrojtjes Sociale (MSHMS) që paguhet nga buxheti i shtetit të menaxhojnë linjën e denoncimeve anonime të dhunës dhe abuzimit, që mesa kuptoj, janë gjithmonë në dijeni paraprakisht për rastet që denoncohen aty, por për çfarëdo arsyeje informacioni nuk shkon tek institucionet shtetërore menjëherë që të merren masat e nevojshme.

Ndaj, kemi kërkuar hetim urgjent administrativ për protokollet që zbatohen nga OJF-të që paguhen nga buxheti i shtetit për të ofruar shërbim publik për mbrojtjen e fëmijëve.”

Shahini u shpreh se ka kërkuar që “Urdhri i Psikologut të raportojë për trajnimet që ka zhvilluar për çështjet e ngacmimit dhe abuzimit seksual, me psikologët gjyqësorë dhe ata shkollorë”. “U kemi dërguar bashkive kriteret që duhet të plotësojnë rojet dhe stafi sanitar që na i sjellin nëpër shkolla. Bashkitë duhet të kenë parasysh që stafi që punon në shkollë duhet të jetë me integritet.”

Ndër të tjera, ministrja vuri në dukje edhe mënyrën si trajtohet dhuna ndaj grave në media:

“Keni dëgjuar për termin “krim pasioni” si term që media e përdor për të raportuar mbi vrasjet e grave nga burrat e tyre? Nëse vritet një burrë, ky është një krim i rëndë. Nëse vritet një grua nga partneri i saj, ky është krim pasioni dhe e gjithë shoqëria kërkon arsyet e vrasjes tek sjellja e gruas.

“Ajo ka bërë diçka që e ka bërë burrin xheloz dhe ka çuar tek vrasja”, dhe menjëherë me t’u përdorur këto fjalë lehtësohen rrethanat e vrasësit dhe u çohet porosi burrave dhe djemve që po, “me ligj mund edhe të dënoheni, por shoqëria ju jep të drejtë mbi trupat e grave dhe vajzave”.

Natyrisht që ne kemi përgjegjësi institucionale ta ndryshojmë kulturën në shkollë, por secili nga ju keni përgjegjësi individuale të ndryshoni kulturën në rrethin tuaj.”

Përsa i përket reagimit të qytetarëve, përpos atyre që kanë përgëzuar Shahinin për nismat e marra, ka patur edhe të tjerë që fjalën e saj e kanë quajtur “qëndrim moralist dhe jo profesional”. “Problemi duhet kapur nga koka dhe jo nga bishti. Në gjithë botën bëhet verifikimi periodik i personelit të shkollave, jo vetëm i mësuesve, por edhe i kuzhunierëve, rojeve etj,” shkruan dikush. “Duhet të merrni masa për të gjithë stafin pedagogjik. Bëni roje shkollash e kopshtesh njerëz të marrë nga rruga,” lexohet në një tjetër koment. “Duhet të mbani përgjegjësi zonja ministre. Përdhunuesi ka qenë në ambientet e shkollës, institucion në të cilin jeni ju përgjegjës,” thotë një i tretë.

Ministrja shpjegon pse nuk do të prononcohet për rastet e abuzimit

Ministrja shpjegon pse nuk do të prononcohet për rastet e abuzimit

MOS I HUMBISNI