Deri në përfundim të gjendjes së fatkeqësisë natyrore, e cila përfundon më 23 qershor, disa aktivitete do të vazhdojnë të qëndrojnë mbyllur. Ministrja e Shëndetësisë dhe Mbrojtjes Sociale, Ogerta Manastirliu, u shpreh se këto aktivitete “do të jenë të ndaluara deri në një urdhër të dytë” dhe do të vlerësohen në datën 23 qershor.
Aktivitetet vijojnë kështu:
- aktivitetet kulturore
- kinema
- teatër
- klubet e natës
- pishinat
- grumbullimet masive
- dasmat
- konferencat
- dëgjesat publike
- tubimet
Përsa i përket aktiviteteve që do të hapen të hënën (1 qershor), Manastirliu tha:
“Do të lejohen nga data 1 qershor kampionatet sportive, pa praninë e publikut. Do të hapen parqet, qendrat e formimit arsimor, kulturor, qendrat e internetit si dhe palestrat nën rregulla strikte të sigurisë. Po punohet me Ministrinë e Infrastrukturës dhe Transporteve për një plan të transportit publik të sigurt, i cili do të jetë gati në një kohë sa më të shpejtë. Deri atëherë transporti publik do të jetë i mbyllur.”