Luhatja e shifrave, e ardhur si pasojë e dy vatrave që e ngritën shumë bilancin, erdhën si pasojë e papërgjegjshmërisë së një infermiereve dhe një Call Center-i.
Për të dytën herë, Tirana mbetet qyteti i vetëm i rasteve të rezultuara pozitivë, shumica prej të cilëve, personel shëndetësor.
Pavarësisht numrit të lartë (26), epidemiologu Pëllumb Pipero u shpreh për Abc Neës se vatrat janë të izoluara dhe po vijon hetimi për rastet e kontaktit.
Sipas Piperos, situata aktuale tregon se masat e marra nga ana e bluzeve të bardha kanë "çaluar diku", duke shtuar se infermierja shkonte në punë dhe tregohej e pakujdesshme pavarësisht simptomave të dukshme të sëmundjes.
“Nëse në 3 ditë kemi 60 apo 70 raste pozitive, po t’i spostojmë një muaj më parë do kishim 30 të shtruar në spital, ne tani nuk kemi asnjë, më parë kishim 1 apo 2 në spital..Kjo pasi 95% janë pa simptoma. Duke qenë se janë institucione duhet të evidentohen, testohen, për të ndërprerë zinxhirin epidemiologjik.
Në radhë të parë, është përgjegjësi e çdo bluze të bardhe, jemi të trajnuar, të mësuar, pastaj është përgjegjësi institucionale. Ne nuk jemi rasti i parë në botë që ndodh te bluzat e bardha. Dua të nënvizoj që u identifikua shpejt dhe u izolua. Sot janë marrë analiza edhe për kontaktin e fundit. Impakti jashtë spitalit është zero.”
Më shumë se numri i rasteve, mjeku u shpreh i shqetësuar për neglizhencën që në rastin konkret nisi nga ekipi i mjekëve.
"Problemi është te neglizhenca. Mos harroni që janë 15 persona që nuk vinë dot në punë në spital. Duhet të rrinë në shtëpi të vetizolohen. Ka një sërë pasojash që mund të ishin parandaluar nëse ekipi i mjekëve do të ishte i përgjegjshëm.”
Përsa i përket hapjes së vendit, daljes së njerëzve dhe takimeve, Pipero tha se nuk është e rekomandueshme që këto të shmangen, por koha e takimit mes njerëzve është mirë të jetë e shkurtër.
