Agron Llakaj ka kritikuar ashpër “Aventurierët”, reality show-n që transmetohet çdo të premte në Top Channel.

“Kjo video që po shikoni, nuk është kamera e fshehtë dhe aq më pak amatore. Është një reality show, ‘Aventurierët’, dhe shfaqet çdo të premte në televizionin kombëtar Top Channel. Nuk dua të merrem me Top Channel, qëllimin për të mbështetur një show kaq të shëmtuar dhe të rëndë në çdo pikëpamje...degjenerim, shthurje, perversitet. I drejtohem AMA-s, institucioni i monitorimit të mediave audiovizive!”

Për kontekst, në video duken dy nga protagonistët, Kri dhe Stivi, që thonë se kanë bërë seks ndërsa dy vajzat e tjera, Vali dhe Dodo, puthin djem në buzë teksa luajnë një lojë me dënime.

“Si mund të lejohet një show kaq kriminal për edukimin e fëmijëve nëpër ekranet tona. Covid-19 nuk është asgjë përpara kësaj të keqeje kombëtare që po mbillet nëpër ekranet tona[...]Rrugaçëria ka ndërtuar modele të respektuara nëpër auditore. Këta që shikoni në këtë reality show, nesër do të shfaqen si vip-at e ardhshëm.”

Llakaj shton se i duhet thënë “stop degjenerimit” dhe thotë se “AMA është përgjegjëse direkte”.

“Aventurierët” është një reality show me protagonistë shtatë të rinj që nisen drejt Spillesë për të jetuar në një shtëpi dhe për të punuar në një bar pranë plazhit. Atyre nuk u lejohen telefonat, rrjetet sociale dhe duhet të ndjekin urdhrat e menaxherit. Për transmetimin e tij reagoi i zhgënjyer edhe Florian Binaj.

“TV duhet të edukojë njerëzit, shikuesit, ndjekësit, sidomos rininë e cila do pika orientimi dhe frymëzimi,” tha ai në Instagram. “Sot u zhgënjeva jashtë mase nga një program që po jepet në televizionin ku punoj. Dëshpërim që sot në TV promovohen antivlerat dhe jo vlerat. Kjo do i hapë rrugën një udhe pa krye.”