Ndonëse mbrëmjen e djeshme kryeministri i vendit lajmëroi përmes një statusi në Facebook se "kjo fundjavë do të jetë njësoj si ajo e kaluara", njerëzit nuk ishin të qartë.
A do të lejohen baret/restorantet? A do të jenë të hapura qendrat tregtare? Fasha orare është deri në 17:30 apo deri në 21:00? Të gjitha këto, përbënin shumicën e pyetjeve nga ana e qytetarëve të konfuzuar. Madje, një pjesë e mirë e bareve mëngjesin e sotëm ishin hapur duke mos ditur me saktësi si duhej të vepronin.
Ministria e Shëndetësisë, ka publikuar së fundmi urdhrin që njofton se fundjava është e kufizuar, që do të thotë:
1- Baret/restorantet dhe çdo lloj aktiviteti që nuk është farmaci apo pikë shitje me produkte ushqimore do të jenë të mbyllura.
2- Dy kategoritë më sipër do të jenë të hapura ditën e shtunë deri në orën 21:00, ndërsa e diela është e mbyllur për të gjithë.
3- Sot dhe nesër të moshuarit do të mund të dalin deri në orën 10:00 bashkë me një njeri tjetër që i shoqëron.
4- Pas orës 11:00 do të mund të lëvizin prindërit me fëmijë deri në 14 vjeç përgjatë gjithë fundjavës.
