Në një intervistë për ABC News, guvernatori i Bankës së Shqipërisë, Gent Sejko u pyet në lidhje me printimin e parave dhe hedhjen e tyre në treg, si një mënyrë për të lehtësuar pasojat e krizës së koronavirusit.
Në ekonomi, njihet si Helicopter Money dhe është një politikë monetare e sugjeruar si alternativë për lehtësimin sasior kur ekonomia është në një kurth likuiditeti. Gjatë kësaj politike, shuma të mëdha parash shtypen dhe shpërndahen në publik për të stimuluar ekonominë gjatë kohës kur normat e interesit shkojnë në zero.
“Është dëgjuar teoria e Helicopter Money, pra hedhja e parasë nga helikopteri përkthehet shqip, por nuk është tamam kështu, por është injektimi direkt ose shpërndarja direkte e parasë nga banka qendrore te qytetarët[...]” – tha Sejko.
Në vijim, ai u shpreh se “lehtësimi sasior do të bëhet duke blerë letrat me vlerë të qeverisë”.
“Lehtësimi sasior do të bëhej vetëm në këtë mënyrë duke blerë letrat me vlerë të qeverisë. Ekziston ky skenar, e kemi njoftuar. Është skenari i fundit në rast se qeveria do i ketë konsumuar të gjitha burimet.”
Guvernatori u shpreh se rihapja dhe rikthimi në normalitet po jep shenjat e para.
