Art & Libra

Kriza e koronavirusit: Ky CEO mendon që Franca duhet të shesë Mona Lisa-n

Shkruar nga Anabel

19 Maj 2020

Kriza e koronavirusit: Ky CEO mendon që Franca duhet të shesë

Si një kundërpërgjigje ndaj krizës ekonomike të shkaktuar nga Covid-19, Stéphane Distinguin, themeluesi i kompanisë teknologjike Fabernovel, sugjeroi që Franca të shesë Mona Lisa-n e Leonardo da Vinçit.

Kriza e koronavirusit: Ky CEO mendon që Franca duhet të shesë

Mona Lisa është një nga pikturat më të vlefshme në historinë e artit dhe konsiderohet kryevepër e Rilindjes Italiane; e përshkruar si “piktura më e njohur, më e vizituar, më enigmatike dhe më e përfolur në histori”. Në vitin 1962, Mona Lisa theu rekordin Guinness për vlerësimin më të lartë ndonjëherë, plot 100 milionë dollarë, afërsisht 650 milionë dollarë me vlerën e sotme.

“Ditë pas dite, ne llogarisim miliardat e humbura si fëmijët që hedhin gurë në pus për të parë sa i thellë është,” tha Distinguin për revistën Usbek & Rica. “Ne jemi ende duke numëruar dhe kriza është e padurueshme.”

Ai shtoi se pikturat janë lehtësisht të lëvizshme. “Ne kemi shumë piktura. Në 2020-n na duhet të gjejmë para ku të mundim. Kështu që shesim xhevahirin e familjes. Mona Lisa mendoj që vlen të paktën 50 miliardë euro.”

Ndër të tjera, ai sugjeroi edhe që Franca dhe muzeu i Luvrit të lejonin që Mona Lisa të shkëmbehej lehtësisht midis kombeve. “Do të funksiononte si një abonim i madh global. Ligjërisht dhe teknikisht kjo zgjidhje do të kishte shumë përparësi dhe do t’i lejonte Francës dhe Luvrit të mbanin në kontroll pikturën.”

Referuar kërkimeve në Google, Mona Lisa është një nga 10 pikturat më të njohura në botë, e renditur në vendin e parë, ndjekur nga “Darka e fundit”, po e Da Vinçit dhe “Nata me yje” e Van Gogh.

MOS I HUMBISNI