Zgjedhjet për rektorët e universiteteve dhe dekanët e fakulteteve, të cilat qenë parashikuar të mbaheshin në fund të marsit, por u shtynë për në fillim të qershorit për shkak të pandemisë, nuk do të zhvillohen, të paktën jo derisa të ketë një datë të qartë për rikthimin e studentëve në auditore.

Ministrja e Arsimit, Sportit dhe Rinisë u shpreh se vendimi u ndërtua mbi propozimet e vetë studentëve dhe u koordinua me të gjitha institucionet e angazhuara në këtë process, përfshirë edhe zyrën e presidentit.

“Pa patur mundësi të votojnë studentët, natyrisht që nuk mund të ketë zgjedhje të mirëfillta nëpër universitete. Përderisa nuk kishim siguri se data e mëparshme mundësonte gjithëpërfshirjen e studentëve, u detyruam ta shtyjmë atë.”

Në rregulloren “Për organizimin e zgjedhjeve për autoritetet drejtuese dhe senatin akademik në Universitetin e Tiranës” në nenin 38 për “Pavlefshmërinë e zgjedhjeve” thuhet se Komisioni Institucional i Zgjedhjeve i shpall zgjedhjet në universitet si të pavlefshme në rast se (pika b) “kanë ndodhur fatkeqësi natyrore në përmasa të atilla, që kanë penguar pjesëmarrjen e zgjedhësve në votim”. Thënë e gjitha kjo që zhvillimi i zgjedhjeve në universitet, nisur nga fakti që studentët do të kthehen në auditor në mënyrë të pjesshme, shkonte përtej rregullores.