Ashtu siç u njoftua edhe më herët nga ministrja Ogerta Manastirliu, baret dhe restorantet pritet të hapin dyert më 18 maj. Sot, portali e-Albania ka publikuar protokollin që të tilla biznese duhet të ndjekin si masa mbrojtëse kundër pandemisë.
Udhëzimet, përmbajnë masa strikte si për klientët ashtu dhe për punonjësit dhe çdo hallkë tjetër të këtij biznesi.
Siç mund ta lexoni më poshtë, personeli i bareve/lokaleve do të ketë shumë pak kontakte me klientët, ndërkohë që është rreptësisht e ndaluar të prekë hundën, gojën, apo sytë pasi ka prekur sende apo para të marra nga klientët.
Punonjësit duhet të bëjnë vetë vlerësimin e shenjave të koronavirusit si dhe janë të detyruar të tregojnë rreth historikut të kontakteve me persona të infektuar. Që prej 18 majit, përgjegjësit e lokalit kanë për detyrë të verifikojnë simptomat e të gjithë punonjësve.
Gjithashtu sipas udhëzimeve të përkohshme publikuar nga e-albania, do të ndalohen të gjithë personat me temperaturë mbi 37.5 të futen në ambientet e lokalit.
Në ambientet brenda nuk do të lejohet më shumë se një klient, ndërkohë që jashtë klientët duhet të respektojnë distancën. Klientëve do t'i rekomandohet pagesa me kartë, për të shmangur kontaktin përmes parave.
Baret dhe restorantet duhet të vendosin shenjat e distancës së sigurisë të detyrueshme për klientët që presin në radhë.
