Pak ditë më parë, ministrja Besa Shahini njoftoi se prioritet për rikthimin në shkolla do ta kenë vetëm maturantët, të cilët do të sillen bazuar në rregullat e normalitetit të ri. Çfarë do të thotë kjo? Gjatë një lidhje për Abc News, Shahini tha se nëpër klasa nuk do të jenë më shumë se 12 nxënës, duke shtuar që edhe në shkollat tona do të veprohet si në vendet e tjera të botës. 

"Do të jenë maksimumi 12 nxënës në klasë, të cilët do të ruajnë distancën prej 2 metrash dhe do të merren masa për higjenizimin e klasave. Gjithashtu, do të merren masa të tjera që si nxënësit ashtu dhe mësuesit të jenë të sigurtë. Ajo çfarë duam ne të sigurojmë është që çdo shkollë të ketë mjetet e nevojshme për të kryer pastrimin. Klasat do të jenë të pastra."

Pavarësisht riorganizimit të ri, ministrja dha dhe opsionin e qëndrimit në shtëpi për maturantët. Pra, të gjithë ata që nuk ndjejnë se kanë nevojë për konsultime, mund të mësojnë nga shtëpia dhe të paraqiten vetëm për datat e provimeve. 

Rikthimi nëpër shkolla po bëhet posaçerisht për ata që kanë nevojë të konsultohen paraprakisht.

Burimi: Abc News