Gjatë komunikimit të fundit live, Ministrja e Arsimit, Besa Shahini njoftoi vendimin e marrë në lidhje me arsimin e lartë. Shahini tha se pavarësisht mësimit online, shumë studentë e kanë të nevojshëm t'i rikthehen auditorëve, por kjo do të ndodhë në mënyrë të pjesshme.
Pritoritet për t'u kthyer në auditore do të kenë studentët që janë në prag diplomimi. Ata do të rikthehen për 3-4 javë në qershor dhe provimet do t'i zhvillojnë në korrik dhe javën e parë të gushtit.
"Universitetet kanë autonomi dhe riorganizimi i punës ishte detyra e universiteteve. Të gjitha universitetet i janë përgjigjur thirrjes, por jo të gjitha në të njëjtën mënyrë. Edhe për lëndët që kanë kaluar online, po kuptoj që nuk është mbajtur i njëjti standard i punës. Prioritet është puna me studentët që do të diplomohen.
Do të mundësohet kthimi në auditore për 3-4 javë në qershor 2020. Studentët e viteve të para mund të planifikojnë të mos jenë në auditore deri në fund të gushtit."- u shpreh ajo duke iu drejtuar veçanërisht atyre të rinjve që jetojnë nëpër shtëpia me qira dhe kanë nevojë për një organizim paraprak për çështjen e banimit.
Më pas, nga 25 gushti deri në fund të shtatorit mund të kthehen në auditore ata që nuk janë për t'u diplomuar, por ndjejnë nevojë për përsëritje apo punë laboratorike. Provimet do t'i mbajnë në tetor.
Ministrja Shahini bëri gjithashtu të qartë se mësime në auditore me numrat e mëparshëm të studentëve, nuk do të ketë më. Minimizimi i numrit të studentëve dhe sigurimi i distancimit fizik janë kushtet kryesore të rikthimit në universitete.
