Ditën e djeshme, aktorët Gentian Hazizi dhe Ledio Lako u konfrontuan fizikisht, aq sa u desh ndërhyrja e policisë për t'i ndalur. Ngjarja ndodhi në afërsi të bulevardit "Gjergj Fishta",por sipas Lakos çfarë ndodhi ishte vetëm një sherr banal.
Në një intervistë për Panorama.al, aktori i humorit është shprehur se gjithçka ndodhi pas provave në Teatër, duke e quajtur "konflikt trotuaresk që ka përfunduar në rrena".
“Sherr artistësh, për çfarë do zihemi tjetër për drogë?! Jemi zënë për tekstin. Genti mund të jetë i axhituar, por këto doreza janë kot. U zumë kot, pas teatrit për punë roli. Jo roli jot, jo ma thuaj batutën, jo s’ma thua batutën. S’ka qenë ndonjë konflikt për t’u raportuar, por me që po kalonte policia aty..."- u shpreh aktori.
Ndryshe nga çfarë u përfol, Ledio Lako mohoi të jenë përdorur sende të forta nga palët dhe tha se ka patur thjesht goditje me duar.
“Me shpulla jemi goditur. Nuk të nxjerr njeri nga rajoni po të gjuash me dorezë, mjet metalik të fortë."
Mësohet se në vendin e ngjarjes ka qenë i pranishëm edhe një person i tretë që sipas Lakos ishte mik i Gentian Hazizajt, i cili dashur pa dashur u përfshi në konfliktin mes të dyve.
Ndërkohë kalimtarë të rastit kanë shkruar në inbox-in e Anabel_media, se në vendin e ngjarjes u mblodhën shumë policë dhe madje mbërriti edhe një ambulancë.
"Po kaloja kur ndodhi sherri. Më i nxehuri dukej Gent Hazizi. Ai bërtiste më shumë, dukej sikur akuzonte Ledio Lakon për diçka."- shkruan një prej dëshmitarëve.
"Ka ndodhur midis shkollës 9-vjeçare ”Pjeter Budi” dhe rruges ”Myslym Shyri”. Policia ka ardhur nga 21 dhjetori (ku ndodhet komisariati nr. 2). Kanë qenë shumë policë dhe më pas ka ardhur dhe një ambulance. U bë aq rrëmujë, sa menduam se kishin qëlluar me armë. Kështu qe ”sherr banal”, veshtirë të thuhet."
Nga ana tjetër, Gentian Hazizi zgjodhi të mos e komentojë sherrin me kolegun e tij, duke thënë se "nuk ka asgjë për të thënë".
Burimi: Panorama
