Në Revista Anabel në Facebook, pas një pyetje në lidhje me shqetësimet e krijuara nga gjendja e pandemisë, dikush vuri në dukje problemin me çiftet që janë karantinuar në shtëpi të ndryshme.

“Unë dhe partneri im jemi karantinyar në shtëpi të ndryshme. Ne kemi disa kohë që bashkëjetojmë, por pas pandemisë na u desh që të shpërnguleshim secili te prindërit, sepse janë të moshuar dhe s’kisi si kujdeseshim ndryshe. Në fillim situata ishte ok, por sa më shumë javë kalojnë aq më e vështirë bëhet. Zihemi dhe inatosemi çdo ditë. E kuptoj që stresi dhe pasiguria ndikojnë [...]”

Të njëjtin problem diskutuan edhe disa ndjekës në @anabel_media në Instagram, të cilët theksuan se “situata është e njëjtë me një marrëdhënie në distancë” dhe duke qenë se nuk e kanë përjetuar më parë një raport të tillë, e kanë të vështirë të përshtaten.

Për shumë çifte, izolimi në një shtëpi është e pamundur, ndaj si duhet vepruar në këtë situatë?

Gjëja më e mirë që mund të bëni në fakt është që ta trajtoni situatën pikërisht si një marrëdhënie në distancë. Nëse keni pasur më parë një raport të tillë, do ta keni më të lehtë, në të kundërt do të duhet të përshtateni.

“Nuk kemi zgjidhje tjetër,” shkroi dikush në @anabel_media. Në fakt, kjo vlen shumë për të lehtësuar distancën. Në momentin që çiftet pranojnë rrethanat dhe binden se nuk kanë asnjë zgjidhje tjetër, nisin dhe i përshtaten kontekstit. Është shumë e lehtë të ankohesh, por duhet që të testoni durimin dhe forcën e marrëdhënies suaj.

“Komunikimi është çelësi dhe në këto kohë duhet vepruar ‘tërhiqe mos e këput’,” u shpreh një tjetër ndjekës. Në fakt qëndron si argument. Në ditë të zakonshme, gjërat do të ishin më normale – ju do të takoheshit, do të diskutonit, do të binit dakord se çfarë nuk shkoi mirë dhe do të ishit sërish njësoj. Debatet virtuale nuk janë fort të thjeshta. Përkundrazi mund ta përkeqësojnë situatën. Prandaj, në fjalë të thjeshta, mos vini re çdo gjë.

Në fund, me rëndësi janë takimet ~virtuale~. Darkë në distancë apo Netflix Party janë disa ide të këndshme.