Sot (10 prill) në vendin tonë nga 162 teste të kryera, vetëm 7 kanë rezultuar pozitivë me Covid-19. Nisur nga kurba në rënie, në komunikimin e tij të fundit, kryeministri Rama ka njoftuar në lidhje me masat e reja lehtësuese.

Sipas tij, fundi i muajit maj do të shënojë daljen nga faza e parë e kësaj lufte dhe një pjesë e mirë e aktivitetit ekonomik mund t'i rikthehet normalitetit të ri, sigurisht bazuar tek rregullat dhe masat e reja.

Duke nisur nga dita e hënë, fasha orare do të zgjatet për shërbimet ushqimore, farmaceutike dhe bankare. Të gjitha këto do të mund të operojnë deri në orën 17:30.

"Do të zgjerojmë brenda javës së ardhshme (nëse kurba e infeksionit do të qëndrojë në trendin aktual) mundësinë e lëvizjes me automjet privat të atyre që punojnë në hapësirën e lejuar të aktivitetit ekonomik. Gjithashtu, brenda javës do të përgatisim rregulloren e standarteve bazë të sigurisë për njësitë ekonomike që do të hapen në vijim."- shkruan Rama.

Ndër vendimet e reja, ai shtoi se javën që vjen do të publikohet paketa e zgjeruar e mbështetjes financiare për të lehtësuar bizneset e vogla dhe punonjësit e bizneseve të mëdha.