“Një votë më shumë për Lega (parti politike në Itali), një shqiptar më pak në Milano,” ka qenë një nga sloganet e partisë në kohën kur Salvini nuk e fshehu racizmin, po i njëjti Salvini që së fundmi zbuloi një dashuri të papritur për Shqipërinë.

Në një kohë pandemie si kjo, vështirë që dikush t’i kujtonte postimet raciste të tij, por jo pas videos ku falenderon popullin shqiptar.

Videoja e kryeministrit Rama që fliste për popullin italian dhe ndihmën e Shqipërisë ndaj Italisë përmes ekipit të mjekëve dhe infermierëve mori goxha vëmendje ndërkombëtare. Salvini gjithashtu shprehu mirënjohje për shqiptarët, aq sa u tha njerëzve se kishte telefonuar Ramën për ta falenderuar.

Kjo dashuri ndaj Shqipërisë ishte e papritur sepse, nisur nga postimet e hershme në Twitter, deri para pak kohësh nuk dukej sikur kishte ndonjë adhurim për Shqipërinë, madje ka “protestuar” kundër Bashkimit Europian dhe faktit që i dha Shqipërisë statusin e vendit kandidat për në BE.

Më parë, Salvini shkruante se dëshironte të hiqte dorë nga Europa dhe t’ua linte shqiptarëve. “Le t’ua lëmë Europën shqiptarëve. Dalim ne. Si thoni?” shkruante ai.

Shtojmë se pas tërmetit të 21 shtatorit, revista muzikore Rolling Stones Italia shkroi në Twitter: “Tërmeti mbërrin në Itali nga Shqipëria, e shihni çfarë ndodh kur mbani portet hapur? Përveçse pabuksa, bënë të dridhen gjysma e shtëpive në Puglia.”

Në pamje të parë, postimi dukej me nota raciste kundër shqiptarëve, megjithëse të shumtë qenë njerëzit që vunë në dukje se në fakt nuk bëhet fjalë për një postim racist, por ironi për politikën e zëvendëskryeministrit dhe ministrit të Brenshëm, Matteo Salvini, që qëndroi në detyrë në periudhën 1 qershor 2018–5 shtator 2019.

Siç e kuptuat, Salvini ka mbajur një qëndrim dhe politikë strikte kundrejt emigrantëve duke u shprehur se nga portet e hapura (ku bëhet fjalë për klandestinët) vendit i vjen vetëm e keqja. Të njëjtin qëndrim, Salvini ka pasur edhe ndaj emigrantëve shqiptarë, që i ka quajtur “kriminelë”, ndonëse më pas ka sqaruar se “është abuzuar me përgjithësimin”, sepse u referohej vetëm personave të përfshirë në veprimtari kriminale.

Politika e tij u kritikua ashpër edhe nga organet e Bashkimit Europian, që vunë në dukje se “asnjë emigrant nuk mund të dëbohet nëse i rrezikohet liria dhe jeta në vendin e origjinës”.

Burimi: nextQuotidiano