Paraditen e sotme u bë publik lajmi se kreu i Urgjencës, Skënder Brataj ka rezultuar pozitiv ndaj Covid-19.

Aktualisht i vetëizoluar në shtëpinë e tij, Brataj ka treguar gjendjen shëndetësore përmes një statusi në Facebook.

"Temperatura ime në këtë moment është vetëm 37.5 nga 39.5 që ishte dy ditë më parë. Ne, personeli mjekësor dhe mbështetës nuk i shmangemi dot betejës, linjës së parë për të cilën jemi përgatitur. Eshtë mëse normale që sado masa parandaluese të marrësh, në front mund të dëmtohesh në këtë luftë të padukshme, ndërsa ju mund të ekspozoheni sa më pak. Bëhuni të padukshëm për koronavirusin." - shkruan ai. 

Shefi i Urgjencës njoftoi se për pak kohë, edhe ai do të punojë nga shtëpia duke i kërkuar njerëzve të vijojnë të qëndrojnë të izoluar. Deri më tani numri total i të prekurëve në vendin tonë është 123 ndërkohë që numri i viktimave ka shkuar në pesë.