Dje, Arilena Ara konfirmoi zyrtarisht titullin e këngës me të cilën do të na përfaqësojë në Eurovizion-in e këtij viti! Nëse deri tani ju ishte fiksuar "Shaj", bëhuni gati të mësoheni me "Fall From The Sky"- (Bie nga qielli). 

"Fall From The Sky" do të performohet nga Arilena në gjysmën e dytë të natës së dytë gjysmëfinale, në Rotterdam.

Ndryshimi i titullit, i ka konfuzuar paksa ndjekësit e saj në Instagram, të cilët pyesnin se ç'ndodhi me "Shaj" apo nëse kjo është një këngë e re.

Këngëtarja po punon prej kohësh për ta përshtatur këngën fituese në anglisht dhe në version më modern, në mënyrë që të kuptohet dhe tingëllojë mirë për audiencën e huaj.

Premiera e "Fall From The Sky" nuk është shfaqur ende, por me shumë gjasa në ditët në vazhdim Radio Televizioni Shqiptar s'do të vonojë ta publikojë.

"Shaj" ishte kënga fituese e Festivalit të Këngës, që u mbajt në dhjetor të vitit të shkuar.