Çfarë momenti spektakolar! Pak më parë, “Përputhen” e nisi puntatën e kësaj jave me një akuzë shumë të rëndë: Antoneta është e lidhur... Ose të paktën kështu thonë ndjekësit e programit.

Produksioni paraqiti si provë dy foto të Antonetës përkrah të njëjtit djali misterioz, identiteti i të cilit s’u bë publik në asnjë moment. Por, Olti Currit i shkau pak goja dhe la të kuptohej se djali në fjalë është i njohur në showbiz prej një martese të mëparshme me një vajzë të famshme. Fotot tregojnë një përqafim ndoshta të pafajshëm, ndoshta të fajshëm mes Antonetës dhe atij.

Antoneta tha se fotot janë të vjetra, se e ka shok, se njerëzit duan t’i prishin punë, se ka video të djalit në fjalë që përqafon vajza të tjera. Në momentin që tha këtë, iu kërkua t’ia dërgonte videon regjisë, a thua se do të vërtetonte ndonjë gjë. Nuk e dimë si, pse dhe çne Antoneta kishte videon në fjalë apo si e gjeti me aq shpejtësi (apo si iu fshehën fytyrat protagonistëve për 30 sekonda), por e kishte. Djali anonim përqafon jo një, por dy vajza në video.

Nevina Shtylla u sigurua të shtonte disa herë se ky s’është një rast i veçuar. Me dhjetëra herë ndjekësit u kanë shkruar dhe u kanë thënë se Antoneta është e lidhur jashtë programit, por vetëm në këtë instancë u sollën prova konkrete.

Antoneta nuk pësoi asnjë penalitet dhe shumica e djemve nuk besojnë se ajo është e lidhur. Argumenti kryesor? Nëse do ishte e lidhur s’do ia lejonte vetes të shkonte te "Përputhen" dhe të dilte me djem të tjerë.