Ca produkte duken më mirë se të tjerët në foto dhe video. Është thjesht fakt. Ca produkte pastaj janë thjesht superiorë edhe në jetën reale. Këta pesë që kemi përfshirë në këtë artikull duken gjithmonë yll në ekranin e telefonit apo në ekranin e televizorit. Nëse keni foto të rëndësishme për të bërë ose nëse ju kanë ftuar në ndonjë emision, me këto në çantën e grimit jeni të nderuar.
Fondatina e preferuar për foto/video është Double Wear Stay-in-Place nga Estee Lauder. Shpërhapet me pakëz vështirësi, por pasi shpërhapet s’ka gjë që e lëviz; shiu, djersa, koha apo duart nuk i bëjnë dot dëm kësaj fondatine.
Ky rimel nga Essence i jep qerpikëve një volum që s’e injoron dot. Janë zgjatime? Janë qerpikë fals? Apo është ai rimeli rozë që s’ia mësova kurrë emrin? Quhet I Love Extreme dhe është shumë i lirë.
Laura Mercier Translucent Loose Setting Powder është kreu, koka, liderja, udhëheqësja dhe superiorja e të gjitha pudrave. Poshtë saj është Huda Beauty Easy Bake Powder. Kështu mund të fotografoheni dhe filmoheni për orë të tëra me grim të paprekur.
Për të njëjtin qëllim nevojitet edhe një spraj fiksues që rifreskon fytyrën dhe lidh produktet me njëri-tjetrin. Më të preferuarit dhe më të pëlqyerit janë Mac Prep + Prime Fix + dhe Urban Decay All Nighter Long Lasting Setting Spray.
Kini parasysh se fytyra dhe trupi duhet të jenë një ngjyrë dhe të njëtrajtshme. Prandaj nxirësi nuk është opsional nëse tregoni lëkurë. Inglot Face And Body Bronzer është i lirë, ka shkëlqim të bukur dhe nuk transferohet në rroba.