Kushdo që nuk ishte në protestën e organizuar nga presidenti Meta (2 mars) ose nuk pati rastin ta ndjekë live në televizion, me gjasë mund të jetë ndeshur me dhjetëra lajme shkruar nga media – që konsiderohen serioze – për “bukuroshen seksi në krah të presidentit”.

“Kush është studentja seksi”, “Kush është studentja bukuroshe”, “Zbulohet studentja bukuroshe në krah të Metës” etj., ishin disa nga titujt që mbushën portalet, të cilat në ditët e tyre të zakonshme supozohet të merren me vendime të Komisionit të Rindërtimit, ligjin anti- KÇK, analiza të qeverisë dhe opozitës ose çfarëdo situate tjetër ekonomiko-sociale. Por jo, përpos raportimit të protestës së presidentit, këto media u ndalën edhe te “bukuroshja seksi”.

Do të ishim përpjekur ta përtypnim përcaktorin e përdorur në titull, nëse nëpër artikuj të paktën do të ishte zbardhur një pjesë e fjalimit të studentes e cila quhet Oneda Skënderi. Askush nuk u mor me çfarë tha? A qëndronte ajo që tha? Pse mbajti një fjalim? Në pjesën më të madhe të artikujve, Oneda ishte thjesht “studentja e Drejtësisë që ishte aktive edhe në protestën e studentëve”. Kaq.

Teksa mediat merreshin me bukuroshen seksi, u desh që Oneda të sqaronte personalisht në “Ftesë në Pesë” se nuk është pjesë e një partie politike dhe nuk mendon të jetë. Fjalimi ishte thjesht një detyrim, të cilin ajo e ndjeu ta bënte si pjesë e të rinjve që e duan Shqipërinë dhe kanë vendosur të jetojnë këtu. “Nuk ka asgjë të keqe të anëtarësohesh në parti politike, por këtu nuk kanë emër shumë të mirë dhe personalisht mendoj se nuk do të përfshihem ndonjëherë. Thjesht do të ndjek gjithmonë të gjitha protestat dhe mitingjet që në thelb kanë diçka të drejtë, pavarësisht se nga kush [organizohen]. Rëndësi ka kauza. Shoqëritë demokratike të shëndetshme janë ato që kanë përplasje idesh, kanë debate,” u shpreh Skënderi.

Nuk është hera e parë që për disa klikime më shumë, tkurret figura e vajzave dhe grave duke përfunduar në një portretizim të shëmtuar dhe të cekët që mjaftohet vetëm te sipërfaqja. Ky portretizim mospërfillës ndaj thelbit dhe kauzës që trajtohet vjen përmes një gjuhe seksiste që përpiqet t’u referohet vajzave dhe grave vetëm për dukjen e tyre. Nëse jeni kuriozë për fjalimin e Onedës, vështirë ta gjeni nëpër media sepse pakkush u mundua ta merrte parasysh, paçka se foli për arsimin dhe problemet e të rinjve shqiptarë.

Personalisht Onedën nuk e njoh, megjithëse nuk më duhet ta njoh që të kuptoj se realisht është e patolerueshme gjithë ky trajtim aspak serioz që u bëhet njerëzve – në këtë rast vajzave dhe grave – duke zgjedhur t’i injorosh e të merresh me “pjeshkëzimin” e tyre për hir të disa klikimeve të papërfillshme.