Pas disa muajsh rezistencë nga artistët dhe shoqëria civile, Bashkia e Tiranës vendosi të tërhiqej nga plani për ndërtimin e godinës së Teatrit Kombëtar sipas skemës Partneritet Publik-Privat. Në njoftimin e Bashkisë, thuhet se godina e Teatrit do të rindërtohet me mbështetje financiare të fondeve publike.
"Modeli financiar i propozuar nga pala private e interesuar për ndërtimin e godinës së Teatrit të ri Kombëtar dhe zhvillimit të zonës urbane, por edhe kompleksiteti i projektit, i cili duhet të përmbushte të gjitha kërkesat teknike të kërkuara nga përfaqësia e artistëve në komision, nuk mundësonte ndërtimin e godinës në një kohë të shpejtë dhe me infrastrukturë moderne për një teatër bashkëkohor[...]Nisur nga interesi për të ndërtuar një godinë bashkëkohore dhe moderne, që plotëson të gjitha kushtet teknike për realizimin e shfaqjeve, e cila t’i shërbejë komunitetit artistik teatror dhe publikut artdashës, Qeveria dhe Bashkia e Tiranës vendosën që godina e re e Teatrit Kombëtar të ndërtohet nga shteti si një investim publik.” – shkruhet në deklaratë.
Në vijim, Bashkia shton se “do ta ndërtojë Teatrin e ri Kombëtar në një kohë më të shkurtër kalendarike dhe në përmbushje të të gjitha kërkesave teknike të shprehura nga komuniteti i artistëve në konsultimet publike”.
Aleanca për Mbrojtjen e Teatrit reagoi në rrjete sociale duke shkruar ndër të tjera:
“Kauza jonë është ndërtuar mbi themelet e drejtësisë, kjo është arsyeja që njerëzit na kanë mbështetur, se përndryshe do të përfundonim si ndonjë grup estetësh, ndaj ka qenë e pastër në mesazh dhe e pakontestueshme.”
