Australia u trondit së fundmi nga një ngjarje e rëndë, ku ish-lojtari i regbi Rowan Baxter i vuri flakën makinës, ku ndodhej ai, ish-gruaja dhe tre fëmijët.
Hannah Clarke, 31 vjeçe, dhe fëmijët e çiftit, Laianah, 6 vjeç, Aaliyah, 4 vjeç dhe Trey, 3 vjeç, ndërruan jetë. Baxter, 42 vjeç, mori plagë në makinë, por arriti të dilte. Më vonë, ai goditi veten me thikë për vdekje. E vetmja që u nxorr gjallë nga makina ishte Hannah, por për shkak të plagëve të marra ndërroi jetë në spital.
Dëshmitarët okularë thanë se ajo bërtiste “ai më ka hedhur benzinë” dhe “shpëtoni fëmijët e mi” kur mbërritën njerëzit e parë në vendngjarje.
Prindërit e Hannah-s thanë për Daily Mail Australia se vrasja ishte “kulmi i marrëdhënies” e cila mori të tatëpjetën kur Hannah vendosi të ndahej nga bashkëshorti abuziv prej 11 vitesh.
“Gjithçka u përkeqësua pasi ai u largua kur nuk mund ta kontrollonte më situatën,” tha e ëma e të ndjerës, Suzanne Clarke. “Ai kërkonte të futej në hapësirën e saj, e kontrollonte shpesh. Nuk punonte dhe marrëdhënia nisi të vështirësohej.”
Baxter u lejua të shihte fëmijët gjatë fundjavave, por tensionet mes tyre çuan dhunë ndaj nuk u lejua t’i afrohej vendit ku jetonte Hannah sepse ajo kishte marrë urdhër mbrojtjeje të përkohshme.
Prindërit e saj besojnë se Baxter i gjurmonte telefonin pasi shpesh “dinte gjëra që nuk supozohet t’i dinte”. “Ajo ndryshonte shpesh fjalëkalimet. Ishte e tmerrshme,” shtuan ata.
Mendohet se Baxter përmes përgjimit të telefonit arriti të zbulonte vendodhjen e Hannah-s.
Familja beson se vrasja tragjike qe kulmi i marrëdhënies së tyre, në të cilën Baxter abuzoi emocionalisht dhe fizikisht me 31-vjeçaren që prej fillimit.
