Në Sanremo, qetësia dhe druajtja e Georgina Rodríguez që ngjitej për herë të parë në një skenë dhe mbi të gjitha nuk di të flasë italisht, u pasua nga entuziasmi i Alketa Vejsiut, e cila me një italishte të përsosur dhe të rrjedhshme “vodhi” për pak minuta vëmendjen e Amadeus-it.

Gjatë fjalimit, Alketa theksoi se “Sanremo është pika më e fortë e karrierës së saj”. Më pas, pasi falenderoi shqip shqiptarët që jetojnë në Shqipëri, Vejsiun e “rrëmbeu” skena dhe për pak çaste u duk sikur ishte Amadeus-i asistenti i saj, i cili i vuri në dukje me humor faktin që Alketa kishte folur më shumë seç ishte parashikuar. Në një moment, ajo ngjiti sërish shkallët e skenës, një gjest simbolik për karrierën e saj.

Në skenë, moderatorja u shfaq e veshur me një fustan nga Dolce & Gabbana dhe bizhu të markës prestigjioze italiane, Damiani, ekskluzivitet në Shqipëri i Kastrati Jewellery.