Ashtu siç i ka hije një personazhi publik, Romeo Veshaj u prononcua për ndarjen e papritur nga Jonida Maliqi pa i përmendur asnjë herë të vetme emrin. I ftuar dje në “ThumbOn,” ai konfirmoi se gjithçka mes tyre kishte marrë fund, por ruajnë ende raporte miqësore.

U deshën spërdredhje të shumta të fjalës që Romeo të thoshte me plot gojën “jam single.” Njëherë tha se s’është vetëm, sepse sipas tij, asnjëri s’është kurrë vetëm. Pastaj tha se s’i pëlqen të deklarohet single sepse i duket si reklamë. Dhe pastaj e tha troç që është ndarë nga Maliqi.

“Nëse do ndodhë diçka në jetën time private, do jem i pari që do e shfaq. Ajo tjetra pastaj ishte e dukshme. Nuk e kam mohuar asnjë herë. Heshtja është pohim. Çfarë ka ndodhur është e shkuar, anija u mbyt. Kapiteni u mbyt me gjithë anijen. Sado ta riparosh, Titaniku nuk lundron më,” tha ai për sa i përket romancës me këngëtaren.

Kush la kë? “Të gjithë kanë faje, nuk e ndajmë fajin,” përfundoi ai.

Gjithashtu, Romeo mohoi thashethemet se është lidhur me Sara Kolamin. “Nuk ka pasur asgjë mes nesh, s’e njoh as personalisht.” Mohoi edhe të ketë pasur lidhje me Fifin apo Xheisarën. Se kur supozohej të lidhej tre herë Romeo pak kohë pas ndarjes, nuk e dimë.