Shqipëria

Sizmologët qetësojnë qytetarët: Pse s'ka vend për panik

Shkruar nga Anabel

29 Janar 2020

Sizmologët qetësojnë qytetarët: Pse s'ka vend për

Lëkundjet e tërmetit të djeshëm, me magnitutë 4.9, shkalla Rihter (ora 21:15) rikthyen panikun tek qytetarët e Durrësit dhe të Tiranës. Shumë njerëz lanë sërish shtëpitë për ta kaluar natën jashtë, nga frika e një goditjeje edhe më të fortë, e ngjashme me atë të 26 nëntorit. 

Por ç'thonë sizmologët? A ka vend për panik duke qenë se thuajse 2 muaj më pas rikthehen lëkundje të kësaj shkalle?!

Sizmologu Rexhep Koçi nga Instituti i Gjeoshkencave tha për ABC News se tërmeti i djeshëm është pasgoditje e atij të 26 nëntorit, duke e quajtur ngjarje "post-tërmetore".

“Janë pasgoditje të termetit të 26 nëntorit, është një ngjarje e regjistruar pranë epiqendrës. Nuk mund të quhet termet i fortë, por i moderuar."- u shpreh ai.

Koçi tha se pasgoditje të tjera priten në vijim, por sipas tij këto lëkundje janë të padëmshme.

“Pasgoditje të tjera do të priten edhe në ditët në vijim, janë ngjarje normale sizmike. Tërmetet janë të padëmshme për strukturat kur janë me magnitudë më pak se 5 të shkallës Rihter."

Sizmologët qetësojnë qytetarët: Pse s'ka vend për

Nga ana tjetër, inxhinierja Luljeta Bozo, e cila luajti rol shumë të rëndësishëm në qetësimin e qytetarëve gjatë tërmetit tragjik, tha se njerëzit mund t'i rikthehen banesave dhe të qëndrojnë të qetë. Edhe për të, tërmeti i orës 21:15 ishte pasgoditje. 

Bozo, u bëri thirrje vetëm qytetarëve të cilat i kanë banesat e dëmtuara, duke thënë se nuk duhet të qëndrojnë brenda për të mos rrezikuar.

“Nëse shtëpitë nuk kanë pasur asnjë dëmtim, ose gjëra të vogla njerëzit të kthehen dhe të flenë rehat. Nuk besoj që do ketë të tjerë. Kurse ata që i kanë të dëmtuar shtëpitë nuk kanë pse të rrinë brenda. Nuk ka kuptim të rrinë brenda. Një shtëpi e dëmtuar, një goditje e tillë e përkeqëson gjendjen. Ku ka dëmtime të rënda nuk duhet rrezikuar. Në si inxhinierë nuk e llogarisim fare tërmetin e sotëm. Kështu që nuk është një energjie e tillë që shkakton dëm të strukturës. Kuptohet, kur ndërton sipas rregullave."- përfundoi ajo.

MOS I HUMBISNI