Shqiptarët qenë po aq entuziastë sa ndjekësit e huaj, fanatikë të Eurovizionit, në lidhje me aludimin e Elvana Gjata do të përfaqësojë San Marino-n në festivalin e njohur europian.

Në sondazhin e Anabel.al, pjesa dërrmuese, saktësisht 72%, u shpreh se “do të ishte e paparë që Elvana të përfaqësojë San Marino-n”. Por si qëndron e vërteta? A ka marrë Elvana vërtet një ftesë për të përfaqësuar mikroshtetin në Eurovision Song Contest në Rotterdam?

Burime pranë këngëtares u shprehën për Anabel.al se “nuk është e vërtetë që Elvana ka marrë një ftesë” dhe “janë po aq të surprizuar sa vetë ndjekësit”. Deri në këto momente, e gjitha mbetet thjesht një dëshirë e fansave.

Sidoqoftë, nuk do të ishte çudi që Elvana të merrte një ftesë. Siç e kemi sqaruar në një tjetër artikull, San Marino është një mikroshtet në Itali me 34.000 banorë e për pasojë, i është dashur të huazojë këngëtarë nga vende të tjera të botës për ta përfaqësuar. Shtojmë gjithashtu se nuk janë të pakta vendet që tregohen të hapur ndaj idesë për të marrë pjesë me një këngëtar të huaj. Për shembull, në 2009-n, Besa Kokëdhima mori pjesë në “Selectia Nationala” për të përfaqësuar Rumaninë në Eurovizion. Kënga e saj “Nothin' Gonna Change” shkoi deri në gjysmëfinale. Po kështu, dy vite më parë Eleni Foureira, e cila e ka nisur dhe ndërtuar gjithë karrierën në Greqi, përfaqësoi Qipron.