Breshëri, stuhia dhe qindra milimetra shi “pushtuan” Australinë këtë javë, por natyrshëm lind pyetja nëse janë shuar zjarret masive?

Përgjigjja është jo. Megjithatë shiu i ka ndihmuar zjarrfikësit që të kontrollojnë përhapjen e tyre. Burime lokale u shprehën për The Guardian se Australia pati “ulje dramatike” të aktivitetit të zjarrit.

Megjithatë ka ende 87 zjarre që vazhdojnë duke shkatërruar sipërfaqe të tëra. “Jo domosdoshmërisht shiu ka shuar zjarret, por ka ndaluar përhapjen,” shtuan përfaqësuesit lokalë.

Situata kaotike vazhdon ende, pasi zjarrëfikësit kanë konfirmuar se situata mund të përkeqësohet brenda ditëve, pavarësisht motit. “Ka të ngjarë që zjarret të rriten sërish në fund të javës.”

Zjarret në Australi vazhdojnë që prej qershorit të 2019-s, veçanërisht në zonën jug-lindore, ku edhe u shpall gjendja e jashtëzakonshme. Që nga 14 janari, zjarret kanë shkatërruar 18.6 milion hektarë tokë, kanë shkatërruar 5,900 ndërtesa dhe kanë shkaktuar vdekjen e 30 personave. Mendohet se numri i kafshëve të djegura shkon në një miliardë.

Burimi: The Guardian, CNN