Më 8 shkurt 1920, Tirana u shpall përkohësisht kryeqytet dhe më vonë mori përfundimisht këtë status. Kjo do të thotë që pas thuajse tre javësh, do të festojë 100-vjetorin si kryeqytet. Me këtë rast, Bashkia e Tiranës hapi një garë për të zgjedhur logon e re që kremton njëherazi përvjetorin dhe qytetin.

Finaliste u përzgjodhën këto katër logo nga Kuadr, Florian Sallo, Blerim Tuzi dhe Karrota. Me një diferencë të ngushtë votash nga logoja e Florian Sallos, fitues u shpall krijimi i Karrotës, që luante me shkronjat për të përcjellë edhe numrin 100. Dizenjo është shumëngjyrësh, pakëz transparent dhe i mbivendosur.

Nuk qenë të paktë qytetarët që menduan se logoja është në mos e vjedhur, e frymëzuar më shumë se ç’duhet nga një krijim i dikujt tjetër. E krahasuan me një sërë logosh të ngjashme në të gjetura në internet dhe me logon e Expocity, hapësirën e panaireve dhe ekspozitave në dalje të Tiranës.  

Fisnik Ismaili, kreu i Karrotës – që gjithashtu ka ideuar dhe realizuar monumentin New Born në qendër të Prishtinës – reagoi përmes një statusi në Facebook ku publikoi vetë dizenjo të ngjashme dhe u përpoq të bënte dallimin mes trendit dhe plagjiaturës.

“Të nderuar gazetarë e dizajnera amatorë, për të akuzuar dikë për plagjiaturë duhet të paktën të keni një fije njohuri për dizajnin. Kryesorja, të dini të dalloni stilin (trendin/mediumin) prej konceptit. Dytësorja, mos të vuani prej kompleksit të mosdijes e të bëni të tilla gabime që të dukeni të ditur,” shpjegon Ismaili. “Këtu janë dhjetëra shembuj në botë të logove që përdorin stilin e njëjtë të dizajnit shumëngjyrësh, gjysmë të tejdukshëm, ku ngjyrat i hipin njëra-tjetrës dhe kombinohen. Google e përdor shumë së fundi. Por në dallim prej tyre, origjinaliteti i logos së Tiranës është pikërisht te gjetja e bukur e inkorporimit të numrit 100 në emër, duke përdorur stilin (trendin) në fjalë.”

Më pas, Ismaili rikujton kohën kur u ngrit New Born në Prishtinë dhe sipas tij, të njëjtët gazetarë e akuzuan si të vjedhur nga monumente të ngjashme në Amsterdam. Sidoqoftë, New Born fitoi shtatë çmime ndërkombëtare.

Në grupin privat në Facebook, Marketing in Albania, Gert Zenelaj, që siç u vetëdeklarua s’është as dizajner dhe as dizajner amator, ngre disa pyetje në lidhje me logon fituese.

Zenelaj nuk kupton ç’lidhje kanë ngjyrat me Tiranën sepse sipas tij, në qytet, me përjashtim të fasadave dhe gjelbërimit, nuk ka ngjyra. Së dyti, si do të aplikohet kjo logo shumëngjyrëshe në dokumentat bardhë e zi, ku do të përdoret përgjatë një viti. Në përfundim të statusit, Zenelaj shprehet se “nuk e akuzon Karrotën për plagjiaturë, por për mungesë kreativiteti dhe profesionalizmi.”

Në replikë të Gert Zenelaj, Ismaili mohon të ketë fituar se njihet me kryebashkiakun, zbulon se puna është bërë pa pagesë sepse “Karrota deshi t’i dhuronte diçka Tiranës.” Ai thotë se zgjodhi shumë ngjyra sepse “shumëngjyrësia simbolizon diversitetin: njerëzit e ndryshëm, objektet, profesionet e aktivitetet.”

Ismaili publikoi një propozim tjetër që nuk u përzgjodh finaliste ku vihet re i njëjti dizajn shumëngjyrësh dhe theksimi i numrit 100 në brendi të tekstit. Për sa i përket objekteve identifikuese të Tiranës, si Kulla e Sahatit (që ishte fokusi i logos së dytë më të votuar), Ismaili thotë se “zgjodhi një qasje tjetër me numra dhe ngjyra. Qëllimisht nuk e limitova me objekte të cilat sot janë, e nesër mund t’i zhdukë një tërmet.”

Gjithashtu, ai publikoi versionet bardhë e zi dhe negativin për t’iu përgjigjur një nga pyetjeve të ngritura.

Ismaili ka të drejtë kur thotë se logoja e Tiranës s’është as e para dhe as e fundit me këto ngjyra, font apo mbivendosje. Por mjafton ideja e vetmuar e inkorporimit të numrit 100 në emër për t’u quajtur origjinale. Teknikisht, edhe logoja e Lojërave Olimpike në Tokio 2020 ka vetëm rrathët olimpikë dhe vitin 2020, por ndërthurja e bën të veçantë.

Sidoqoftë, një punë e mirë nuk ka nevojë të mbrohet kaq shumë.

Statusi i Gert Zenelaj

Fragmente të përgjigjeve të Fisnik Ismailit: