Anxhela Peristeri tha me gojën e saj që preferon baladat. I rrinë më mirë, gjen veten. Sidoqoftë, iu desh pak kohë për t’u fokusuar te çfarë i pëlqen vërtet. Në vitin e largët 2004, ajo i dhuroi botës këngën që urren sot e kësaj dite.

E ftuar në “Wake Up,” këngëtarja s’u mendua fare kur Isli Islami e pyeti në ka ndonjë këngë të sajën që do të donte të mos e kishte kënduar. Sapo tha titullin, e kuptuam mungesën e hezitimit: “Mos kërko seks.”

“S’ishte filozofia ime,” tha Anxhela. “Ishte filozofia e menaxherit të atëhershëm, filozofia e tekstshkruesit.”

Pas “presioneve” në studio, ajo interpretoi refrenin që seriozisht ka këtë tekst:

“Mos kërko seks, sepse në fyt të ngec
Mendo një tjetër, ndoshta ty dhe të ec
Me klube nate gjithë jetën do ta çosh
Sipas gustos sate nuk mund të më trajtosh”

Tekstin e plotë të kësaj këngë që duhet të jetë himni i 2004-s, mund ta lexoni këtu, se në YouTube, fatkeqësisht nuk është!!! E kuptojmë pse e urren Anxhela, por kjo s'do të thotë që s'duam ta dëgjojmë. Gjithsesi, sapo të publikohet puntata e sotme e “Wake Up,” do ta përfshijmë në këtë artikull që të dëgjoni refrenin.