Sot, familja mbretërore do të takohet për të biseduar ballë për ballë të ardhmen e Harry dhe Meghan që njoftuan një javë më parë se do të tërhiqen nga rolet e tyre si anëtarë të familjes. Mbledhjen e kërkoi Mbretëresha dhe synimi është gjetja e një zgjidhjeje të arsyeshme për Dukën dhe Dukeshën e Sussex. Sidoqoftë, marrëdhënia e dëmtuar mes Harry-t dhe Mbretëreshës nuk do të rregullohet me një mbledhje.

Pas publikimit të njoftimit, anëtarët e familjes mbretërore ndiheshin të tradhtuar, të lënduar dhe të nevrikosur që një hap i tillë u ndërmor pa u konsultuar me Mbretëreshën. Tani që gjithë bota i ka sytë nga ata, familja mbretërore po përpiqet të gjejë një zgjidhje para se nami i mirë të njolloset përgjithnjë.

Mbretëresha e di më mirë se kushdo tjetër se kjo që po ndodh është shumë e rrezikshme. Vetëm pak muaj më parë, Princ Andrew hoqi dorë nga detyrat mbretërore (për arsye shumë herë më të rënda dhe kontroversiale), ndërsa tani, Britania mund të humbasë dy nga anëtarët më të famshëm dhe më të pëlqyer.

Mbretëresha dhe anëtarë të tjerë të rëndësishëm të familjes e dinin që Harry dhe Meghan kishin në plan të ndryshonin diçka në rolet e tyre, pasi e folën gjatë Krishtlindjes, por shpresonin që të mos tërhiqeshin tërësisht.

“Ndoshta varet nga brezat ose nga mënyra si është rritur, por për Mbretëreshën, detyrimet janë gjithçka në jetë dhe prandaj është mërzitur kaq shumë,” tha një nga të besuarit e Mbretëreshës.

Hija e abdikimit të Mbretit Edëard VIII e torturon ende monarken britanike, edhe pse ndodhi kur ajo ishte vetëm 10 vjeçe. Prandaj ka ndërmend të qëndrojë në detyrë deri ditën që do të vdesë, pavarësisht thashethemeve që do t’ia kalojë kurorën Princ Charles. Detyrimi ndaj postit i është imponuar që në vegjëli dhe kurorë është gjithçka për të. Kjo shpjegon pse është kaq e “hutuar” me vendimin e çiftit.

“Në fund të fundit, është 93 vjeçe dhe është shokuar vërtet,” tha burimi. “Pas gjithçkaje që ka bërë për Harry-n, ndihet e zhgënjyer. Që nga fillimi, ka bërë çmos që ata të dy të ndihen sa më mirë. Familja është shumë e mërzitur me sjelljen e Meghan dhe Harry-t, jo vetëm për ndikimin që ka pasur te Mbretëresha, por edhe sepse pasoi skandalin e Princ Andrew. Harry po sillet si një adoleshent i pabindur. Dha njoftimin dhe e la Mbretëreshën të merrej me pasojat. Marrëdhënia e tyre është copëtuar. Raporti i tyre i ngrohtë gjyshe-nip nuk është më i ngrohtë.”

Mbretëresha e ka pasur gjithmonë pikë të dobët Harry-n, por ka prova që tani s’janë më aq të afërt.

Një burim pranë Mbretëreshës tha se marrëdhënia me Harry-n filloi të kishte probleme gjatë përgatitjeve të dasmës mbretërore. “Ajo u mërzit shumë nga kërkesat e Harry-t dhe nga mënyra si i kërkonte disa gjëra,” zbulon burimi. “Nuk donte të përdorte stafin e mbretëreshës për dasmën, ai dhe Meghan zgjodhën vetë floristin dhe pastiçierët. Dhe, Harry i kërkoi vetë Arqbishopit të Canterbury t’i martonte para se të konsultohej me Mbretëreshën dhe Dekanin e Ëindsor.”

Burimi vijon, “Mendoj se ajo u trondit nga sjellja e tij në përgjithësi. Më kujtohet që më tha se s’i besohej sa i pacipë po tregohej Harry. Marrëdhënia e tyre thjesht mori të tatëpjetën nga ai moment.”

Përshtatur nga Vanity Fair