Pavarësisht se Instagrami mbetet rrjeti social më i përdorur për qëllime marketingu, YouTube po fiton gjithnjë e më shumë terren edhe te komuniteti shqiptar. Ka një interes në rritje nga personazhet e njohur për të hapur një kanal në YouTube, referuar edhe interesit të njerëzve. (Për referencë: Në një sondazh të Anabel.al, 57% u shprehën se “e përdorin shpesh” YouTube-in për të parë video për makeup, ushtrime fizike, sfida të ndryshme etj).
Brezi i parë i YouTuber-save shqiptarë duket se ka përfshirë më së shumti moderatorët, të cilët iu bashkuan shumë shpejt Armina Mevlanit, Lori Hoxhës, Powerpuffs Pojani (krijuar nga Megi Pojani dhe motrat e saj) dhe Capital T.
Modetatori Flori Gjini është i fundit që hapi një kanal në YouTube. Vlogu i tij i parë përfshin një udhëtim të papritur drejt Kosovës me miqtë. Në gjashtë minuta, Flori premton një sërë peripecish.
Përpos Florit, edhe Liesa Haxhiasllani, ish-moderatorja e "Select" në Top Channel dhe "Ditë për ditë" në Tv Klan, iu bashkua YouTube-it. "Hey hey! Kjo është video ime e parë në Youtube ku tregova disa fakte interesante rreth meje (që nuk do ju hynë në punë për asgjë)" shkruan Liesa me humor në video.
Kiara Tito e ka marrë më shumë seriozisht nga të gjithë. Moderatorja poston të paktën një video në javë dhe përgjithësisht përmbajtja e videove lidhet me kujdesin për lëkurën, makeup-in, ushqimet, jetë reale vs. Instagram etj.
Pas ardhjes në jetë të djalit të saj, edhe Jona Spahiu vendoi të hapte një vlog. “Unë jam Jona Spahiu, figurë publike prej vitesh, por gjithnjë e rezervuar kur vjen puna te profili im përtej ekranit. Teksa kam kaluar me veten këtë kompleks, ndjej të jem më e afërt me ju përmes komunikimit që do të vendosë ky kanal,” shkroi ajo,” shkroi ajo. Të vetmet video që ka publikuar moderatorja lidhen përkatësisht me pyetje rreth shtatzënisë, mënyrën si u bë pjesë e televizionit dhe në të fundit, publikuar pesë muaj më parë, Jona tregon si të realizoni ondet e valëzuara.
Alketa Vejsiu gjithashtu ka një kanal në YouTube, ku përpos videoeve të emisioneve dhe eventeve, poston edhe video me tematikë si lidershipi, bukuria, gratë. Së fundmi, Vejsiu shkroi në Instagram se do të publikojë në YouTube gjithë çfarë ndodhi në prapaskenë gjatë “Festivalit të Këngës”.
Gjithë ky popullaritet i të pasurit një vlog lidhet me faktin se vlogu është e kundërta e Instagramit: ka më pak filtra dhe i bën ndjekësit të përfshihen në video, a thua se janë përballë personit.
