Festivali i Këngës në RTSH u shoqërua me polemika edhe në përfundim të tij. Pas gjithë diskutimit rreth votimit dhe fitores, edhe Elvana Gjata u detyrua të thoshtë fjalën e saj.

"Refuzoj të flas në këto raste, por më duhet ta bëj. Arilena, nuk është faji yt dhe të uroj me gjithë zemër vetëm sukses. Dua të falenderoj të gjithë shqiptarët kudo që ndodhen, por dhe fansat e rinj europianë për dashurinë, mbështetjen që më keni dhënë që ditën që "Me tana" doli. I kam parë të gjitha sondazhet e ju kam parë të këndoni e të kërceni me sytë e mi çdo ditë, e ju pashë edhe në sallë me duart lart.

Ju kam dëgjuar kur thërrisni emrin tim plot zjarr në festivale, në diasporë dhe në Prishtinë, e dëgjova edhe dje në Tiranë si kurrë më parë në jetën time. Kam punuar fort e do punoj derisa të kem frymë. Puna s'më ka hedhur kurrë poshtë, as balta e helmi, me apo pa porosi. Faleminderit jurisë europiane për vlerësimin maksimal. Dashni më fal, as 2 pikshi i Mikaelës s'mundet me ma ndal!"- shkruan Elvana përmes një postimi në llogarinë e saj të Instagram-it.

Ndonëse juria e huaj e votoi këngën "Me tana" me pikët maksimale, Mikaela Minga i dha vetëm 2, votim i cili përmbysi rezultatin fillestar.