Fill pas fitores në “Festivalin e Këngës”, Arilena Ara publikoi në Instagram një foto të shkëputur nga momenti kur ngrinte kupën. Ndër komentet në foton në fjalë ra në sy komenti i Robert Berishës, i cili shkruan se “Arilena e ka merituar me tana”.
Nuk duhen më shumë se dy neurone për të kuptuar se përdorimi i “me tana” lidhet me kryefjalën e këngës së Elvana Gjatës, fituesja e vendit të dytë dhe më e favorizuara nga publiku përsa i përket sondazheve online dhe klikime. Mirëpo, nëse u referohemi deklaratave të Robert Berishës së fundmi, duket se komenti është një ironi për fitoren e Arilenës.
Në fillim të nëntorit, në një intervistë për “Mirage” kur ende nuk ishin prezantuar këngët e konkurrentëve, Berisha u shpreh se mendon se duhet të na përfaqësojë Elvana Gjata në Eurovizion. “Nuk mendoj se mundet dikush të ketë këngën më të mirë se të Elvanës,” tha ai.
Mirëpo në një intervistë për “Aperitiv Fest” një javë më parë, tha se ishte i zhgënjyer nga prezantimi i Arilenës dhe Elvanës, pasi këngët e tyre u dukeshin “si për varrim”.
Deklarata ndryshoi në “Stay Tuned” në MCN Radio, ku Berisha theksoi se ishte nxitur me çfarë kishte thënë. Sipas tij, kënga e Arilenës ishte për Sanremo, ndërsa Elvana Gjata duhet të fitonte “Festivalin e Këngës”, madje sipas tij ishte edhe fituese e Eurovision 2020.
Në një tjetër intervistë për gazetarët e pranishëm dje në sallën e Pallatit të Kongreseve, Berisha tha se “Elvana duhet të na përfaqësojë në Eurovizion”.
