Në dallim nga bashkëshorti i saj, Olsi, Rezarta Hajdari nuk i shpëtoi dot vdekjes pesë ditë pas dasmës. Çifti u gjet pa ndjenja në shtrat në rrethana misterioze. Më parë thuhej se janë helmuar me fotoksinë, ndërsa Olsi, në një prononcim, la të kuptohej se ishin helmuar nga mangalli që kishin marrë në dhomë para se të flinin.
Vëllai i Rezartës ngre dyshime në një intervistë për Gazetën Shqip.
“Të afërmit e dhëndrit na thanë se janë helmuar me mangall, por ne nuk e besojmë një gjë të tillë. Kemi dyshime që i kanë helmuar. Njeriu nuk mund të vdesë kaq lehtë nga mangalli,” thotë ai.
Mangalli është një enë prej metali, si legen me këmbëza ku ndizet qymyr druri ose mbahet prush për t’u ngrohur. Mund të helmohesh nga mangalli nëse është ndezur qymyr, i cili lëshon monoksid karboni kur digjet. Në ambiente të mbyllura dhe të paajrosura, nivelet e monoksidit të karbonit bëhen vrastare. Sidoqoftë, nuk dihet nëse çifti kishte mangall me qymyr në dhomë.
Vëllai i Rezartës vijon: “Kemi dyshime se dikush nga të afërmit e Olsit mund t’i ketë helmuar nga zilia. Ata të dy e donin shumë njëri-tjetrin. Janë martuar me dashuri dhe dukeshin shumë të lumtur[...] Folëm ne telefon me Rezartën mbrëmjen e të enjtes, pra një nata para ngjarjes dhe e pyetëm si ndihej në familjen e re. Ajo dukej mirë. Na tha që të mos e kishim merak dhe që të mos qanim për të. Kishte vetëm pak ditë e martuar dhe dukej e lumtur.”
Familja e Rezartës i konsideron amanet fjalët e saj të fundit.