Policia bën me dije se në avionin privat të Juice Wrld, reperit që vdiq të dielën, u gjendën armë zjarri dhe drogëra të ndryshme. Oficerët po prisnin që avioni të zbriste në aeroport pasi ishin informuar nga piloti se transportonte substanca të ndaluara. Gjatë kërkimit të avionit, reperi kaloi në krizë dhe humbi jetën.

Autopsia e trupit të 21-vjeçarit nuk qartësoi shkakun e vdekjes dhe në vijim, do të kryhen ekzaminime të tjera.

Policia në Chicago gjeti në avion 41 qese të mbushura me marijuanë, gjashtë shishe shurup kolle Codeine*, dy pistoleta 9 mm, një pistoletë me kalibër 0.40, një karikator municioniesh me kapacitet të lartë dhe plumba që përçajnë metalin.

Dy burra, që u identifikuan si truprojat e Juice Wrld, akuzohen për armëmbajtje pa leje.

TMZ mëson se para se forcat policore të kontrollonin avionin, reperi gëlltiti një grusht me kokrra Percocet**, që besohet të kenë shkaktuar një mbidozë. Gjithashtu, dihet se ndihma e parë i dha Narcan reperit, mjekim që përdoret për të zhbërë efektet e mbidozës.

*Codeine, opiat që përdoret për të trajtuar dhimbjen, kollën dhe diarrenë. Shkakton varësi.

**Percocet, mjekim i përbërë nga oxycodone dhe acetaminophen, është një qetësues opioid që shkakton varësi dhe mbidozë.