Ato kanë të përbashkët dashurinë për elegancën, klasiken dhe materialet e mira. Një psikologe, një ekonomiste dhe një prezantuese ndajnë me Viol Xhafajn sekretet e stilit të tyre dhe zbulojnë disa marka në gardërobë.
MERI DISHNICA
Psikologe
“Stili im është elegant, klasik dhe romantik. Një stil pa shumë mundim. Nuk jam nga ato blerëset e fiksuara që bëjnë shopping çdo fundjavë, por nëse më kap syri ndonjë veshje që më pëlqen në vitrinë, nuk e mendoj dy herë. Më pëlqejnë shumë marka amerikane, si: Calvin Klein, Guess, Banana Republic, Max Azria.”
ELONA VARFI
Këshilltare/ Ministria e Bujqësisë
“Lady-like, klasike dhe krijuese, do ta quaja stilin tim. Veshja ime tregon për atë gruan që unë dua të jem në të ardhmen. Në pjesën e parë të ditës, për shkak të punës, kam një stil zyrtar dhe preferoj veshje klasike Max Mara apo Valentino, ndërsa në fundjavë, së bashku me çantën time Luis Vuitton, zgjedh këpucë me platformë e veshje nga D&G, Fendi apo Chanel. Më pëlqen të blej më shumë jashtë vendit dhe Londra është e preferuara ime për shopping.”
FLORIANA GARO
Prezantuese moti / ABC News
“Këpuca dhe çanta bëjnë diferencën në një femër. Sikur të mundja, një të hënë paradite veshja perfekte nga gardëroba ime do të ishte: këmishë mëndafshi Versace, fund tub i zi Max Mara, këpucë me taka Just Cavalli, pallto Raxevsky dhe çanta D&G. Ndërsa për një të shtunë mbrëma do të zgjidhja një fustan të Roberto Cavalli-t, pallto të Giorgo Armani-t, këpucë Jimmy Choo dhe çantë Max Mara. Nuk do të vishja kurrë diçka në stil mashkullor apo që s’do ta komplimentonte trupin tim.”
