Siç mund ta keni lexuar, këngëtarja e njohur nga Maqedonia e Veriut Tamara Todevska konkurroi sot (e diel, 24 nëntor) te “Kënga Magjike” në kategorinë Big International. Gjatë intervistës së shkurtër para performancës së këngës “Monsters”, producenti Gjebrea i tha se përpos Jonida Maliqit, në festivalin e Eurovizionit të organizuar në Tel Aviv bënte tifo për Todevska-n.
“Unë prisja Armend Ramadanin, grimierin tim sepse mendoja se do të këndoja sërish,” tha Tamara, duke treguar kështu se ndryshimi drastik në votim ishte i papritur për të dhe stafin që e shoqëronte.
Shën.red. Deri pak çaste nga rezultati final, Tamara ishte më e favorizuara, por votimi i publikut ndryshoi rezultatin dhe fitues u shpall Duncan Laurence me "Arcade".
Megjithatë kënga e kompozuar nga Darko Dimitrov “Proud” u rendit në Top10, saktësisht në vendin e shtatë. Shtojmë se për shkak të një gabimi në votim, Tamara u shpall pas spektaklit fituese e Çmimit të Jurisë. Ky çmim iu dha fillimisht Suedisë të përfaqësuar nga John Lundvik. Megjithatë European Broadcasting Union njoftoi se për shkak të një gabimi njerëzor nga juria e Bjellorurisë, rezultati ndryshoi.
Përsa i përket pjesëmarrjes në “Këngën Magjike”, këngëtarja u shpreh tepër e lumtur për pjesëmarrjen në festival. Për të, kënga “Monsters” e kompozuar sërish nga Darko Dimitrov është një këngë për dashurinë. “Për një dashuri shumë të fortë për dy njerëz që nuk munden pa njëri-tjetrin, por nuk mund të jenë bashkë," tha ajo.
