Dje, u bë me dije se Ledri Vula, një reper tejet i suksesshëm në vend, nuk do të jetë më nën menaxhimin e Faton Shoshit. Nuk dihen ende arsyet a shkaqet, por dimë se marrëdhënia është miqësore ngaqë ndiqen ende në Instagram. Provë kjo, e pakundërshtueshme.
Ledri është artisti i katërt që heq dorë nga menaxhimi i Shoshit.
Faton Shoshin mund ta njihni kryesisht si ish të dashurin dhe ish menaxherin e Era Istrefit. Dyshja u nda profesionalisht dhe personalisht kur Era mori famë ndërkombëtare dhe nuk hasi suksesin e pritur me projektet në anglisht. Ata kishin mosdakordësi të shumta në lidhje me hapat e rradhës në karrierën e këngëtares dhe kështu i dhanë fund në 2016-n.
Gushtin e kaluar, reperi Buta njoftoi gjithë moskokëçarje dhe krejt papritur se tani e tutje do të jetë nën menaxhimin e vëllait të tij, Qëndrim Januzi. Kur u pyet rreth shkëputjes, Shoshi tha se i lë artistët të lirë të bëjnë çfarë të duan dhe “kur nuk shkon bashkë, atëherë ndahen rrugët.” Ndërsa Buta tha se donte të ishte artist i pavarur.
Gjithashtu vjet, Zanfina Ismajli bëri bujë kur deklaroi se ishte ndarë nga Faton Shoshi pas 11 vitesh bashkë. Besohet se gjatë kësaj periudhe, Shoshi ka shërbyer si menaxheri i saj. Natyrshëm, me ndarjen e çiftit erdhi edhe fundi i marrëdhënies profesionale. “Kur vjen fundi i besimit, vjen dhe fundi i lidhjes,” tha Zanfina asokohe.
Si gjithmonë, aty ku mbyllen katër dyer, hapet një dritare. Shoshi arriti të marrë nën menaxhim një artiste të re, e fokusuar në rep, që ka publikuar disa këngë minimaliste në YouTube. Ju e njihni si Lea e Alban Skënderajt, të tjerë e njohin si Balkanest në Instagram, por ajo quhet Rinesa Qeriqi dhe pritet të publikojë një projekt me producentin Eestbound.
View this post on Instagram
