Në prill të 2017-s, Ylli Limani publikoi këngën “Ke pi sonte shumë”, ku disa vajza dëfrejnë, pinë alkool dhe shëtisin të shkujdesura rrugëve të qytetit. Një prej tyre, Loredana.

Dy muaj më vonë, Loredana u bë pjesë e lajmeve nëpër portale, ku i referoheshin si “e dashura e Mozzik”. Asokohe ajo ra në sy edhe për stilin e veçantë në të veshur dhe videot me kërcime që postonte vazhdimisht në Instagram.

Në prill të 2018-s, pati zëra se Loredana do t’i përkushtohej muzikës, nisur nga një video e saj ku këndonte “Sonnenbrille”. Dhe ashtu ndodhi. Kënga u publikua dhe më pas u pasua nga të tjera projekte.

Bashkëpunimet me Mozzik, si “Bonnie & Clyde” apo “Romeo & Juliet” i dhanë goxha famë në mesin e këngëtareve që po eksperimentonin gjithnjë e më tepër me muzikën rep. Kontrata me producentët Miksu dhe Macloud shërbeu si një moment kyç në karrierën e saj. Albumi “King Lori” u bë një nga më të dëgjuarit në Zvicër dhe Gjermani.

Nuk ka kurrë publicitet të keq, ndaj pas skandalit për mashtrim dhe zhvatje, ndjekësit e Loredanës u rritën më shumë, klikimet po ashtu. Momentalisht, ajo është shqiptarja më e ndjekur në Instagram, duke zhvendosur në vend të dytë Encën.

Nëse në prill të 2017-s, Lori u shfaq si modele në klipin e Ylli Limanit, në nëntor të dy viteve më pas, saktësisht dy ditë më parë, u shpall këngëtarja më e suksesshme në Zvicër në Europian Music Awards.

Përsa i përket lidhjes me Mozzik – sepse erdhët deri këtu dhe prisni diçka për Zikin – epo deri tani nuk ka asnjë të re. Dihet vetëm që do të qëndrojnë pak kohë larg njëri-tjetrit, mbase në të ardhmen bashkohen sërish.