Që prej qershorit të këtij viti, Bes Kallaku njoftoi se prej 2 vitesh po merret me projektin e ri kinematografik, filmin e quajtur "Faclo". 

Pak orë më parë, aktori i humorit ka publikuar për herë të parë trailerin e komedisë që do të vijë me regji dhe skenar të tij.

"Pas më shumë se dy vite e gjysmë pune, shumë lodhjeje, sakrifice, ju premtoj se "Falco" do t'ju thyejë brinjët nga të qeshurat. Eshtë një pasqyrë e realitetit shqiptar, sjellë në mënyrën më komike. Ky nuk është vetëm filmi im, sepse nuk do të isha këtu pa ndihmën dhe eksperiencën e gjithsecilit që kam punuar gjatë karrierës sime.

Ky është filmi i Besit të Top Channel-it, të Portokallisë, i të "Dielës Shqiptare" dhe i të gjithëve që më keni duartrokitur deri këtu. Eshtë i të gjithë stafit dhe të ekipit të filmit, i të gjithë aktorëve dhe atyre që na ndihmuan, qoftë edhe me një gotë ujë!"- shkruan Besi në përshkrimin e trajlerit.

Me çfarë Besi ka zbuluar deri më tani, komedia trajton përmes batutave dhe humorit problemet aktuale të vendit dhe politikës sonë. Siç dukej dhe në trailer, përveç kastit të aktorëve, pjesë e "Falco" do të jenë edhe personazhë të njohur si; Bleona Qerreti, Olti Curri, Lorik Cana, Dritan Shakohoxha, Rashel Kolaneci, etj.

Filmi do të shfaqet në kinematë e vendit duke filluar nga data 20 nëntor.