Imagjinoni Blendi Fevziun. Po ju lëmë 15 sekonda. A kishte kostum blu veshur në imazhin që ndërtuat në mendje? Sigurisht që po, duhet të jetë ngjyra e tij e preferuar. Fevziu ka gjithashtu bluzë blu, pantallona blu, xhup blu, kollare blu, këpucë blu, tuta plazhi blu, këmishë blu... Le të biem në konsensus që Fevziu ka çdo gjë në blu.

Po Ardit Gjebrean, si e imagjinoni? Nëse e mbathni me xhinse dhe xhaketë me ngjyrë, keni goditur në shenjë. Moderatori i të “Dielës Shqiptare”i shmanget kostumeve klasike dhe zgjedh të vishet më thjeshtë me xhinse dhe xhaketë që zakonisht bie në sy prej ngjyrës a dizenjos.

Erion Isai, porsi Gjebrea, është i dhënë pas xhaketave figurante, që kryesisht kanë kuadratë, të mëdha a të vegjël s’ka rëndësi për sa kohë janë aty. Këto xhaketa ishin protagoniste të “B.E. Coffee” po aq sa Isai gjatë periudhës së tij në Klan. Tani që drejton Bashkinë e Kolonjës, janë rralluar goxha.

Vjet në këtë periudhë, Nora Istrefin e shpallëm “Mjeshtre të Kostumeve,” një titull i trilluar, por që fare mirë mund të ishte i vërtetë. Për Norën, është zgjedhje shumë e zgjuar të veshësh kostume sepse i rrinë! Shumë! Mirë! Në mos kostume, sete me pantallona-xhaketë, fund-bluzë me zinxhir, çfarëdoqoftë-çfarëdoqoftë, mjafton të jenë ideuar për t’u veshur bashkë.

Ndërsa Tayna ka diçka me fosforeshenten këtë periudhë. Në mos një reçipetë a bikini, një vijë në pantallona do jetë fosforeshente. Ndoshta që në club, fansat ta dallojnë me lehtësisht, si puna e Mbretëreshës Elizabeth.