Denoncimi i nënës që prostituonte në sy të fëmijëve të mitur, ku njëri prej tyre luante tutorin e saj, ka shokuar opinionin publik. Prej më shumë se një viti, banorët e kompleksit malajzian, ku gruaja ushtronte aktivitetin e saj, ankoheshin në polici, pa asnjë rezultat. Pas publikimit të ngjarjes në “Stop,” institucionet kanë marrë masa.

Migena Kokeri, Drejtoreshë e Mbrojtjes dhe e Punëve Sociale pranë bashkisë, tha për “Stop” se nëna dhe fëmijët janë hospitalizuar e janë nën kujdesin e psikologëve. Institucion synon të marrë fëmijët në mbrojtje.

“Në çdo moment Bashkia e Tiranës ka prioritet mbrojtjen e fëmijëve, ka prioritet interesin më të lartë të tyre. Rasti i djeshëm ishte një rast goxha sensitiv dhe ne kemi ndjekur me shumë vëmendje dhe shumë angazhim. Në momentin që flasim, nëna dhe fëmijët janë hospitalizuar për shkak të tensioneve, ankthit që kanë pasur. Është një situatë e vështirë për fëmijët dhe për nënën. Po ndiqet me staf profesionist, social, psikolog, terapist në mënyrë që fëmijët të merren në mbrojtje,” tha Kokeri.

Ndërsa policia, zbuloi përmes një deklarate zyrtare se 39-vjeçarja, nënë e dy fëmijëve, është shoqëruar dhe proceduar penalisht shtatë herë për vepra të ndryshme penale si vjedhje, prostitucion dhe dëmtime të tjera me dashje.

Në një rast, ajo i kërkoi dikujt ta shoqëronte deri në shtëpi sepse kishte fëmijët me temperaturë. Shkurtimisht më pas, i vodhi portofolin atij që donte ta ndihmonte. Gjatë kontrollit në banesë, në prani të bashkëshortit të saj, forcat policore gjetën paratë e vjedhura, pranga metalike dhe një shkop gome e sërish u la e lirë për hir të fëmijëve.

Drejtoria e Standardeve Profesionale në Policinë e Shtetit ka nisur një hetim për policët që shfaqen në video, për mënyrën si vepruan apo nuk vepruan kur u paraqitën në vendngjarje.