Këtë vit, në shkollat 9-vjeçare në vend nisi zbatimi i ripërdorimit të librave të vjetër për klasat e fillores. Me përjashtim të klasës së parë, që do të marrin libra të rinj, klasat e tjera do të pajisen me libra të përdorur më parë, tërësisht falas. Rreth 155 mijë nxënës në gjithë vendin kanë marrë ose do të marrin tekstet pa pagesë në shkollat përkatëse.
Një ndjekëse e Anabel në Facebook shprehu shqetësimin e saj në lidhje me tekstet e përdorura. Matematika e klasës së dytë, që mori për të birin, është natyrshëm e përdorur, por jo në gjendje që të përdoret nga një brez tjetër pasi ushtrimet janë të plotësuara në disa raste me stilolaps e në disa raste me laps. Në të dyja rastet, mbesin gjurmë të ushtrimeve të zgjidhura, që do të thotë se nxënësi i ri do të kopjojë nga pronari i parë i librit e nuk do të impenjohet realisht.
“Siç e shikoni në foto, janë libra të plotësuar me laps e stilolaps. Edhe nëse ia fshij, lapsi poshtë është i dukshëm dhe im bir nuk do ta zgjidhë vetë ushtrimin, por do të mundohet ta kopjojë. Kam qenë në të gjitha libraritë e Tiranës, por ishte e pamundur të gjeja libra sepse shtëpitë botuese janë urdhëruar të mos i botojnë, ngaqë qeveria do t’i shpërndajë falas,” thotë ajo.
Ajo thotë se nuk është absolutisht kundër nismës, pasi edhe brezi i saj dikur përdorte libra të përdorur, por dëshiron që të paktën, prindërit që kanë mundësi të blejnë libra të rinj, t’i gjejnë në treg. “Duhet të kem mundësinë t’i blej pa pasur nevojë të kontrolloj nëpër gjithë libraritë e Tiranës,” shton ajo.
Institucionet arsimore janë udhëzuar të ngrenë një komision të veçantë për vlerësimin e gjendjes së librave, komision i cili në këtë rast – e ndoshta në raste të tjera – s’e ka bërë si duhet punën e tij.
