Vjena, afro dy orë larg Tiranës me avion, bileta e të cilit nuk kushton shumë nëse prenotoni me zgjuarsi, u shpall nga The Economist Intelligence Unit, bazuar në indeksin vjetor të kushteve të jetesës, si qyteti më i mirë në botë për të banuar. I njohur për artin, arkitekturën madhështore, hapësirat gjigante të gjelbërta, kafenetë tradicionale e çokollatat, një tjetër cilësi iu shtua tashmë kryeqytetit austriak.

Siç mund ta keni lexuar, Indeksi mori në konsideratë 30 faktorë cilësorë dhe sasiorë, që ndahen në pesë kategori kryesore: stabiliteti (25%), kujdesi shëndetësor (20%), kultura dhe mjedisi (25%), arsimi (10%) dhe infrastruktura (20%).

Kur përcaktohet jetesa në një qytet, mjedisi është një ndër elementet thelbësore për t’u marrë parasysh. Për shembull uji i pijshëm në Vjenë vjen direkt nga Alpet, ndërkohë që gjysma e sipërfaqeve urbane janë të mbuluara me gjelbërim.

Të mos flasim për transportin publik, që është një ndër më modernët dhe më të lirët në botë. Një kartë vjetore për transport publik të mundëson të zhvendosesh kudo në qytet, për vetëm 1 euro në ditë.

Ndryshe nga shumë qytete të tjera, në Vjenë zor se dallohet hendeku i thellë midis shtresave të shoqërisë për shkak se politikat vendase kanë parandaluar pabarazinë përmes kostos së jetesës. Po kështu shkalla e krimit në qytet është më e ulta në 20 vite. Banorët raportojnë për media të ndryshme se qyteti nuk ka lagje të rrezikshme dhe kulturat bashkëveprojnë mirë me njëra-tjetrën pa patur konflikte.

Nëse do të vizitoni Vjenën, kini parasysh që vendasit, janë njerëzit më të lumtur në botë. Pra, zor se do të ndesheni me shikimet e ftohta e të ngrysura gjermane apo zviceriane. Bazuar në një studim të qershorit nga autoritetet lokale, nëntë nga dhjetë vjenezë janë të lumtur.

Nëpër rrugët e pastra dhe të gjelbëruara dëgjohet në sfond Moxarti dhe kundërmon aromë të mirë kafeje dhe çokollate.

Në vijim, gjeni disa nga vendet më të famshme për t’u vizituar në Vjenë.

1. The Hofburg – njihet më së shumti si Imperial Palace, që dikur shërbente si vend për pushtetarët e disastisë Habsburg. Pallati përfshin kafene të vogla, restorante luksoze dhe parqe. Aty ndodhet edhe shkolla e famshme spanjolle e hipizmit. Pjesa më e vjetër e pallatit është ndërtuar në shekullin XIII, ndërsa pjesa tjetër shtrihet në shekullin XX.

2. Katedralja e Shën Stefanit – një monument historik, por edhe një ndër simbolet e qytetit dhe një ndër pikat më të vizituara në qendër të Vjenës. Katedralja 700 vjeçare të ofron një pamje fantastike të qytetit nëse ngjit  343 shkallë të njërës kullë. Arkitektura gotike e shekullit XII, kolonat e mëdha dhe pikturat e shënjtorëve do t’ju mbajnë mbërthyer për minuta me radhë.

3. Pallati dhe kopshtet Schönbrunn – një nga monumentet historike të Vjenës. Pallati pasqyron hijeshinë e arkitekturës baroke me gjithë madhështinë e saj.

4. Kopshti Zoologjik – kopshti zoologjik më i vjetër dhe më i madh në Europë, që ndodhet në zemër të Schönbrunn Palace. Në kopsht ndodhen më shumë se 700 specie.

5. Wiener Rathaus – bashkia e qytetit, e ndërtuar në periudhën 1872-1883.

6. Pallati Belvedere – përfshin dy godina të stolisura nga arkitektura baroke, ku ruhen një nga koleksionet më të mëdha të pikturave të Gustav Klimt.  UNESCO e ka konsideruar Pallatin Belvedere si një vend të rëndësishëm të trashëgimisë kulturore botërore, ku ndodhet edhe një koleksion arti i Vincent Van Gogh, Claude Monet, Max Beckham etj.

7. Kisha e Shën Pjetrit – një nga kishat më të vjetra në Vjenë e ndërtuar me stil barok.

8. Karlskirche – tjetër kishë me arkitekturë baroke që ia vlen të vizitohet.

9. Teatri Kombëtar – njihet edhe si Burgtheater dhe besohet se ka qenë funksional që prej vitit 1741 dhe konsiderohet një nga vendet më të dosmosdoshme për t’u vizituar në Vjenë.

10. Pallati i Operës – po flasim për Vjenën ndaj është e kuptueshme që duhet vizituar edhe The Vienna State Opera House, në nga sallat më të mira të operës në botë.

11. Hundertwasserhaus – fasada shumëngjyrëshe është një tjetër vend interesant. Brenda godinës ndodhen rreth 200 pemë dhe shkurre.

12. Muzeu Kunsthistorisches – i ndërtuar në 1891-shin, sot është një ndër muzetë më të njohur të kryeqytetit, ku ruhen ndër të tjera edhe një koleksion i madh i Bruegel.

13. Natural History Museum – shtëpia e disa prej objekteve dhe sendeve më unike në botë.

14. Biblioteka Kombëtare Austriake – një nga bibliotekat më të mëdha në Europë me më shumë se 200,000 vëllime.

15. Parlamenti – shkrin arkitekturën greke dhe romake, një vend i përkryer për një pikëtakim të artit dhe historisë.

16. The Demel Café – ëmbëlsirat dhe kafetë më të mira në Vjenë.

17. The Donauturm – e njohur si Kulla e Danubit, ka një lartësi 252 metra dhe ndodhet në afërsi të bregut verior të lumit Danub. Donauturm ofron kafene, restorante dhe pamje piktoreske.

18. Wiener Riesenrad – parku i famshëm.

19. Kärtner Strasse – një nga vendet tregtare më të njohura për të gjithë të gjithë të fiksuarit pas blerjeve.

20. Muzeu i Frojdit – ish-apartamenti dhe zyra e vetë Frojdit, e hapur për publikun që prej 1971-shit. Hapësira nuk është e madhe, por përmban një numër të madh sendesh dhe objektesh të themeluesit të psikoanalizës.

Artikull i rekomanduar: Kryeqyteti europian shpallet vendi më i mirë në botë për të banuar - listë me 10 qytetet më të mira për të jetuar.